Apple ឈប់ផលិតចេញ iPad Mini តទៅទៀតហើយ?
ក្រុមហ៊ុន Apple នឹងប្រកាសចេញ iPad Pro ស៊េរីថ្មី អេក្រង់ ១០,៥អ៊ីញ នៅក្នុងសន្និសីទ WWDC ខែមិថុនាខាងមុខ ហើយពេលនេះ មានចចាមអារ៉ាមថា Apple នឹងឈប់ផលិតថេប្លេតអេក្រង់តូចស៊េរី iPad Mini ទៀតហើយ។
យោងតាមរបាយការណ៍ថ្មីនេះ ពីគេហទំព័រ BGR ឱ្យដឹងថា Apple កំពុងពិចារណាគម្រោងឈប់ផលិត iPad Mini របស់ខ្លួន ហើយថេប្លេតនេះ នឹងអាចត្រូវក្រុមហ៊ុនដកចេញពីផលិតកម្ម។ iPad Mini ជាថេប្លេតអេក្រង់តូច ៧,៩អ៊ីញ ខណៈបច្ចុប្បន្ន Apple ទំនងចង់ពង្រីកទំហំអេក្រង់លើ iPhone 8 អាចមានទំហំដល់ ៥,៨អ៊ីញ។ បើវាជាការពិតមែន នោះអាចបញ្ជាក់ជំហររបស់ Apple បាន ដែលក្រុមហ៊ុនចង់ផ្ដោតផលិតឧបករណ៍មានអេក្រង់ធំៗ ជាជាងអេក្រង់តូច ជាក់ស្ដែង iPad Mini ជាដើម។
ក្រុមហ៊ុន Apple ត្រូវគេរំពឹងថា នឹងផលិតចេញ iPad Pro ម៉ូដែលថ្មីក្នុងឆ្នាំនេះ ដែលមានអេក្រង់ទំហំ ៩,៧អ៊ីញ, ១០,៥អ៊ីញ និង អេក្រង់ ១២,៩អ៊ីញ ហើយយើងអាចនឹងឃើញវត្តមាន iPad ថ្មីនេះ បង្ហាញខ្លួនផ្លូវការនៅក្នុងសន្និសីទ WWDC របស់ Apple នៅខែមិថុនាខាងមុខ។
Apple អាចនឹងសម្រេចចិត្ត ឈប់ផលិត iPad Mini តទៅទៀត ឬអាចសម្រេចបន្តដាក់លក់លើទីផ្សារមួយរយៈពេលទៀត ដោយមិនផ្ដល់នូវបច្ចុប្បន្នភាព hardware នោះទេ៕
ប្រែសម្រួល៖ រឹទ្ធិរាជ
ប្រភព៖ BGR
