Display Week គឺជាព្រឹត្តិការណ៍មួយ សម្រាប់បណ្ដាក្រុមហ៊ុនផលិតអេក្រង់ ធ្វើការបង្ហាញរបកគំហើញផលិតផលថ្មីចុងក្រោយរបស់ខ្លួន អំឡុងពិព័រណ៍កំពុងត្រូវបានប្រារព្ធនៅសប្ដាហ៍នេះ ក្នុងរដ្ឋកាលីហ្វ័រញ៉ា។ ចំណែកបុត្រសម្ព័ន្ធផ្នែកអេក្រង់ Display របស់ Samsung ក៏ប្រហែលត្រៀមខ្លួនបង្អួតសមិទ្ធផលថ្មីនឹងគេដែរ អាចជាអេក្រង់ទំនើបមានលក្ខណៈស្វិត យឺត ប្រភេទ “stretchable” OLED នៅក្នុងសន្និសីទ។
យោងតាមគេហទំព័រព័ត៌មានកូរ៉េឱ្យដឹងថា អេក្រង់យឺត (stretchable display) របស់ Samsung គឺជាអេក្រង់ flexible កម្រិតខ្ពស់បំផុតនាពេលបច្ចុប្បន្ន។ សមិទ្ធផលអេក្រង់យឺតបានរបស់ Samsung អាចត្រូវសម្ពោធមានទំហំ ៩,១អ៊ីញ ដែលអាចឱ្យគេពត់បានទាំងសងខាង។
បន្ទះអេក្រង់ពិសេស ដែលអាចត្រូវសម្ពោធចេញនៅព្រឹត្តិការណ៍ Display Week សប្ដាហ៍នេះ នឹងមានទំហំអេក្រង់ ៩,១អ៊ីញ ហើយអាចឱ្យគេពត់កោងបានប្រវែង ១២មីល្លីម៉ែត្រ នៅទិសដៅទាំងពីរ ខណៈ resolution នៅតែមានកម្រិតខ្ពស់។ នេះអាចពុំជារឿងភ្ញាក់ផ្អើលខ្លាំងទេ ចំពោះអេក្រង់បត់នោះ ព្រោះអេក្រង់ប្រភេទនេះ វាជាបច្ចេកវិទ្យាទើបចាប់មានការអភិវឌ្ឍដំបូង ដែលត្រូវការពេលវេលាអភិវឌ្ឍតទៅមុខទៀត។
បច្ចុប្បន្ន វាត្រឹមជាការចាប់ផ្ដើមនៃយុគអេក្រង់ Flexible ប៉ុណ្ណោះ ដែលរំពឹងនឹងបានឃើញបំពាក់នៅលើស្មាតហ្វូនក្នុងពេលអនាគត។ អ្នកនាំពាក្យ ក្រុមហ៊ុន Samsung Display បានពន្យល់អំពីបច្ចេកវិទ្យាអេក្រង់ថ្មីនេះថា ខណៈអេក្រង់ flexible OLED កំពុងត្រូវបានគេផ្ដោតអភិវឌ្ឍឱ្យវាអាចពត់បានតែម្ខាងនោះ ចំណែកអេក្រង់ stretchable OLED ថ្មីរបស់ខ្លួននេះ គឺអាចធ្វើបាន មិនថា រូបរាងកោង ពត់ ឬរមូរនោះទេ គឺអាចធ្វើបានទាំងសងខាង។
ក្រៅពី Stretchable OLED អេក្រង់ ៩,១អ៊ីញហើយនោះ ក៏អាចនៅមានបន្ទះអេក្រង់ glassless 3D OLED ទំហំ ៥,០៩អ៊ីញ ជាបច្ចេកវិទ្យាអេក្រង់ចុងក្រោយ គុណភាពខ្ពស់ ផ្ដល់បទពិសោធន៍ថ្មីលើផ្នែក multimedia និង VR ក៏ដូចជាអេក្រង់ទំហំ ១,៩៦អ៊ីញ ultra-high-desity រហូតដល់ 2250ppi ជាដើម។ សូមបញ្ជាក់ថា អេក្រង់នៅលើ Galaxy S8 ដែលកំពុងចរាចរលើទីផ្សារបច្ចុប្បន្នមានកម្រិតភិចហ្សែល ៥៧០ភិចហ្សែល ក្នុង១អ៊ីញ។
ប្រែសម្រួល៖ រឹទ្ធិរាជ
ប្រភព៖ phonearena
