ថ្មីៗ​នេះ យើង​ទទួល​បាន​ដំណឹង​មក​ថា Apple បាន​ចាប់ផ្ដើម​ធ្វើតេស្ត​រថយន្ត​ប្រើប្រាស់​បច្ចេកវិទ្យា​បើកបរ​ស្វ័យប្រវត្តិ self-driving របស់ Apple នៅ​លើ​ផ្លូវ​សហរដ្ឋ​អាមេរិក ហើយ​ពេល​នេះ រថយន្ត​ត្រូវ​បាន​ថត​ជាប់​នៅ​ក្នុង​វីដេអូ។ តើ​វា មាន​សមត្ថភាព និង​ផ្ដល់​សុវត្ថិភាព ​ក្នុង​ការ​បើកបរ ដោយ​មិន​ចាំបាច់​កាន់​ដៃ​ចង្កូត​កម្រិត​ណា? គេហទំព័រ MacRumors ​បាន​ចុះផ្សាយ​ថា Andrew ​បាន​ថត​វីដេអូ នូវ​រថយន្ត​ស្វ័យប្រវត្តិ​ដែល​ប្រើ​បច្ចេកវិទ្យា Apple Self-driving។ សូម​ទស្សនា​វីដេអូ​ខាង​ក្រោម៖ https://youtu.be/DtQcNHw-w8M ក្រុមហ៊ុន Apple ​កាលពី​ពេល​កន្លង​ទៅ មាន​គម្រោង​ផលិត​រថយន្ត Apple Car ​ដោយ​ខ្លួន​ឯង មាន​ន័យ​ថា ជា​អ្នក​ផលិត Hardware ​ប៉ុន្តែ​ក្រោយ​មក គឺ​មាន​ការ​ផ្លាស់ប្ដូរ​គម្រោង​ទៅ​ជា​អភិវឌ្ឍ​តែ​ផ្នែក​សូហ្វ៊ែរ សម្រាប់​គាំទ្រ​បច្ចេកវិទ្យា​បើកបរ​ស្វ័យប្រវត្តិ​បំពាក់​នៅ​លើ​រថយន្ត​របស់​ក្រុមហ៊ុន​ជា​ដៃគូ​សហការ​វិញ។ Apple ត្រូវ​បាន​អនុញ្ញាត​ពី DMV នៅ​អាមេរិក កាលពី​ខែ​មុន ដែល​ជា​ការ​អនុញ្ញាត​ឱ្យ​ក្រុមហ៊ុន អាច​ដាក់​ឱ្យ​រថយន្ត​ភ្ជាប់​បច្ចេកវិទ្យា Apple Self-driving បើកបរ​សាកល្បង​នៅ​លើ​ដង​ផ្លូវ​សាធារណ​ក្នុង​សហរដ្ឋ​អាមេរិក។ ក្រុមហ៊ុន Apple កំពុង​អភិវឌ្ឍ និង​បំពាក់​ប្រព័ន្ធ​បើកបរ​ស្វ័យប្រវត្តិ​នៅ​លើ​ស៊េរី​រថយន្ត Lexus RX450h SUVs ​ជាមួយ​​រ៉ាដា​មួយ​ចំនួន ក៏​ដូច​ជា​កាមេរ៉ា និង Velodyne 64-channel lidar ​អម​ជាមួយ​សូហ្វ៊ែរ​របស់ Apple ផ្ទាល់។ ក្រុមហ៊ុន​មិន​ទាន់​អះអាង​អំពី​គម្រោង ដែល​ពួក​គេ​ផ្ដល់​ចេញ​នូវ​ប្រព័ន្ធ​សូហ្វ៊ែរ​រថយន្ត​បើកបរ​ស្វ័យប្រវត្តិ ឬ hardware ​នោះ​ឡើយ។ ឆាប់ៗ​ខាង​មុខ យើង​នឹង​ដឹង​ពី​ព័ត៌មាន​លំអិត ហើយ​នឹង​ធ្វើការ​ចុះផ្សាយ​ជា​បន្ត៕ ប្រែ​សម្រួល៖ រឹទ្ធិរាជ ប្រភព៖ MacRumors