បើមានចំណុចទាំងនេះ មានន័យថា អ្នកកំពុងប្រមាថជីវិតខ្លួនឯង
ជីវិតរបស់មនុស្សគឺពិតជា មានតម្លៃខ្លាំងណាស់ ហើយតម្លៃរបស់វា គឺមិនមែនផ្អែកលើការផ្ដល់ពីអ្នកដទៃនោះទេ ពោលគឺវាអាស្រ័យលើអំពើរបស់អ្នកផ្ទាល់តែម្ដង។ មនុស្សមួយចំនួនមិនបានដឹងខ្លួនទេថា ខ្លួនឯងកំពុងតែមើលងាយជីវិត ឬ ប្រមាថជីវិតរបស់ខ្លួនឯង ដោយមិនដឹងខ្លួន ដូច្នេះហើយធ្វើឲ្យជីវិតរបស់ពួកគេរកមិនឃើញពន្លឺដូចគេ។ ខាងក្រោមនេះ ជាសញ្ញាមួយចំនួនដែលបញ្ជាក់ថា អ្នកកំពុងប្រមាថជីវិតរបស់ខ្លួនឯង៖
១) គិតថា ខ្លួនឯងអន់ពេក៖ គ្មាននរណាម្នាក់អាចឲ្យតម្លៃអ្នកបានឡើយ បើសូម្បីតែខ្លួនអ្នកគិតថា ខ្លួនឯងអន់ និង គ្មានតម្លៃ។ អ្នកត្រូវគិតថា ខ្លួនឯងជាមនុស្សម្នាក់ដែលមានតម្លៃ ហើយតម្លៃទាំងនោះ នឹងស្ដែងចេញឡើងតាមរយៈសកម្មភាពការងារ ដូច្នេះហើយ ត្រូវធ្វើជាមនុស្សដែលខិតខំបំពេញការងារខ្លាំង មិនមែនអង្គុយទន្ទេញតែពាក្យ«ខ្លួនខ្ញុំអន់»នោះទេ។
២) ចូលចិត្តប្រៀបធៀបខ្លួនឯងជាមួយអ្នកដទៃក្នុងផ្លូវអវិជ្ជមានខ្លាំងពេក៖ វាជារឿងធម្មតាទេ ដែលមនុស្សភាគច្រើនចូលចិត្តប្រៀបធៀបខ្លួនឯងជាមួយអ្នកដទៃ ហើយវាក៏មិនមែនជារឿងខុសឆ្គងអ្វីឡើយ។ ប៉ុន្តែប្រសិនបើអ្នកប្រៀបធៀបខ្លួនឯងទៅនឹងអ្នកដទៃក្នុងផ្លូវអវិជ្ជមានខ្លាំងពេក នោះវាប្រៀបដូចជា ទាញខ្លួនឯងឲ្យចូលក្នុងភក់ជ្រាំអ៊ីចឹង។ ការធ្វើបែបនេះ គឺវាគ្មានផលល្អអ្វីឡើយ អ៊ីចឹងហើយបើឈប់បានឈប់ទៅ ។
៣) មិនដែលផ្ដល់រង្វាន់ដល់ខ្លួនឯង៖ មនុស្សជាច្រើន តែងទន្ទឹងរង់ចាំការផ្ដល់រង្វាន់ពីអ្នកដទៃ ប៉ុន្តែគ្មាននរណាម្នាក់ គិតរឿងផ្ដល់រង្វាន់ដល់ខ្លួនឯងនោះទេ ជាពិសេសនៅពេលសម្រេចការងារល្អណាមួយ។ ការផ្ដល់រង្វាន់នេះ អាចជា ពាក្យសរសើរចំពោះខ្លួនឯង ការចំណាយពេលដើរកម្សាន្ត ឬ ទទួលទានអាហារឆ្ងាញ់ៗជាដើម ដើម្បីជាការតបស្នងចំពោះការខិតខំបំពេញការងារកន្លងមក។ ដោយសារតែមិនដែលផ្ដល់រង្វាន់ដល់ខ្លួនឯងបែបនេះហើយ បានជា ខ្លួនគ្មានកម្លាំងចិត្ត ឬ អាចបំពេញការងារមានប្រសិទ្ធភាពជាងមុនបាន។
៤) គិតថា ខ្លួនឯងអាចមិនធ្វើបាន៖ គ្មាននរណាម្នាក់កើតមក អាចនិមិតទ្រព្យសម្បត្តិ មាសប្រាក់ តួនាទី និង សមិទ្ធផលការងារធំៗបានឡើយ បើគ្មានការដុសខាត់ លត់ដំ និង ខិតខំប្រឹងប្រែង។ មនុស្សជាច្រើនតែងគិតថា ខ្លួនឯងកើតមកក្នុងត្រកូលអ្នកក្រ ដូច្នេះហើយ គ្មានឡើយឱកាសក្នុងការជោគជ័យធំដុំឲ្យដូចកូនអ្នកមាន។ បើអ្នកគិតថានេះ វាប្រាកដជាក្លាយជាការពិត ព្រោះអ្នកបាននឹងកំពុងបិទផ្លូវរបស់ខ្លួនឯងបាត់ទៅហើយ។ តែបើអ្នកគិតថា អ្វីៗក៏អាចទៅរួចដែរ ដរាបណាអ្នកមិនបោះបង់ ហើយខិតខំឲ្យអស់លទ្ធភាពដើម្បីសម្រេចវាឲ្យបាន។ បើអ្នកគិតថា ខ្លួនឯងមិនអាចធ្វើបានបែបនេះ វាមានន័យស្មើនឹងអ្នកកំពុងតែប្រមាថជីវិតរបស់ខ្លួនឯង។
៥) មិនព្យាយាមអភិវឌ្ឍខ្លួន៖ ក្នុងសង្គមដ៏សែនប្រកួតប្រជែងបច្ចុប្បន្ន ដើម្បីអាចឈរនៅលើទីខ្ពស់បាន វាទាមទារឲ្យអ្នក ត្រូវតែជាមនុស្សដែលមានចំណេះដឹងខ្ពង់ខ្ពស់ និង មានជំនាញច្បាស់លាស់ ដោយមិនមែនកំណត់ត្រឹមតែសញ្ញាប័ត្រនោះទេ តែវាមានលើសពីនេះ។ មនុស្សមួយចំនួនមិនដែលខិតខំអភិវឌ្ឍខ្លួនអ្វីនោះទេ ពោលគឺ ចំណេះដឹងក៏ខ្សោយ ការគិតក៏អន់ ការទំនាក់ទំនងក៏មិនដឹងនៅឯណា ហើយការតាំងចិត្តក្នុងការបំពេញការងារក៏រឹតតែហៅលែងឮ។ អ្នកទាំងនេះ មួយថ្ងៃៗគិតតែពីរអ៊ូថា ខ្លួនមិនជោគជ័យអ្វីឡើយ ព្រោះតែអ្នកនេះអ្នកនោះ តែមិនដែលបន្ទោសដល់ខ្លួនឯងសោះ។
៦) មិនដែលថែទាំសុខភាព៖ សុខភាព គឺជាទ្រព្យសម្បត្តិដ៏មានតម្លៃបំផុតរបស់មនុស្សម្នាក់ៗ។ ប៉ុន្តែមនុស្សភាគច្រើនមិនសូវខ្វល់នោះទេ ជាពិសេសពេលខ្លួននៅក្មេង ឬ មានកម្លាំង។ បើធ្វើការវិញ គឺសឹងតែធ្វើការរកពេលសម្រាកគ្មាន ហើយបើផឹកស៊ីវិញ គឺសឹងលិចថ្លើម។ ទទួលទានសាច់ច្រើន មិនដែលហាត់ប្រាណ ហើយមិនចូលចិត្តបន្លែ ហើយពេលខ្លះធ្វើការហួសកម្រិត។
ប្រការនេះទាំងនេះ នឹងធ្វើឲ្យមនុស្សភាគច្រើនមានការស្ដាយក្រោយនៅពេលអនាគត ជាពិសេសពេលខ្លួនចាស់បន្តិច ព្រោះជំងឺរាប់រយមុខ នឹងចាំស្វាគមន៍ទាំងយប់ទាំងថ្ងៃ ប្រឹងគេចក៏គេចមិនផុត ប្រឹងយកលុយទៅសូកប៉ាន់ក៏ជួយមិនបាន ដូចឃ្លាសម្ដេចសង្ឃទីបេធ្លាប់បានលើកឡើងថា កាលពីនៅក្មេង ខំយកសុខភាពដើម្បីទិញលុយ តែនៅពេលចាស់ទៅបែរជាយកលុយដែលរកបាននោះទៅទិញសុខភាពវិញ។ ប៉ុន្តែទិញមិនងាយបានឡើយ៕
ដោយ៖ រតនា វិចិត្រ
