ក្រុមហ៊ុនទូរស័ព្ទដែលសាធារណជនខ្លះ មិនសូវស្គាល់របស់ចិន គឺ Gionee ថ្មីៗនេះ ទើបបានសម្ពោធស្មាតហ្វូនស៊េរីថ្មីម្ដងដល់ទៅ ៣ម៉ូដែល ដែលបែងចែកទៅតាមកម្រិតសមត្ថភាពដូចជា ស្មាតហ្វូនស៊េរីខ្ពស់ Gionee S10, ស៊េរីមធ្យម S10B និងស៊េរីទាប S10C។
+Gionee S10
Gionee S10 ជាស្មាតហ្វូនល្អបំផុតក្នុងចំណោមស្មាតហ្វូនចេញថ្មីសែស្រឡាយ Gionee S។ វាភ្ជាប់មកជាមួយកាមេរ៉ាសមត្ថភាពខ្ពស់ មានពីរគ្រាប់ខាងមុខ និងពីរគ្រាប់ខាងក្រោយ ពោលគឺកាមេរ៉ាភ្លោះទាំងសងខាង។ កាមេរ៉ាភ្លោះខាងក្រោយមានទំហំ 16MP/8MP sensors និងអាចរូប selfie ដោយកាមេរ៉ាភ្លោះខាងមុខទំហំ 20MP/8MP។
S10 បង្ហាញខ្លួនជាមួយអេក្រង់ ៥,៥អ៊ីញ 1080p LCD ប្រភេទ 2.5D កោងឃុបផ្នែកគែម បំពាក់ឈីប MediaTek Helio P25 ជាមួយអង្គប្រតិបត្តិ octa-core និងមាន RAM 6GB។ ស្មាតហ្វូននេះមានកម្លាំងថ្ម 3,450mAh។
+Gionee S10B
Gionee S10B បានបំពាក់ដោយកាមេរ៉ាភ្លោះនៅខាងក្រោយ ទំហំ 13MP/5MP ហើយមានកាមេរ៉ាមុខតែមួយគ្រាប់សម្រាប់ថត selfie ប៉ុណ្ណោះមិនដូចជាស៊េរី S10 ខាងលើដែលជាកាមេរ៉ាមុខភ្លោះនោះទេ។ កាមេរ៉ាមុខមានទំហំ 16MP និងមានអេក្រង់ទំហំ ៥,៥អ៊ីញ 1080p LCD ហើយប្រើឈីប Helio P10 អមដោយ RAM 4GB និងមានកម្លាំងថ្ម 3700mAh។
+Gionee S10C
ចំណែកម៉ូដែលចុងក្រោយនេះគឺ Gionee S10C ដែលវាមានកាមេរ៉ាក្រោយទំហំ 13MP ខាងមុខទំហំ 16MP។ ប្ដូរពីការប្រើស៊េរីឈីប MediaTek ស្មាតហ្វូន S10C នេះ បានបំពាក់ដោយ Snapdragon 427 របស់ Qualcomm ជាមួយក្រាហ្វិកAdreno 308 និងមាន RAM 4GB។ កម្លាំងថ្មនៅលើ S10C គឺមាន 3100mAh។
ស្មាតហ្វូនថ្មីទាំង ៣ម៉ូដែលនេះ មាននូវរន្ធហាយប្រ៊ីដ អាចប្រើស៊ីមកាតបាន២ ឬប្រើស៊ីមមួយ និងដោតមេម៉ូរី microSD បានមួយ ហើយទាំង៣ ម៉ូដែលសុទ្ធតែមានមុខងារស្កេនក្រយៅដៃ និងប្រើប្រាស់សូហ្វ៊ែរ Amigo OS ក្រោមស្តង់ដារ Android 7.0 Nougat។
Gionee S10 នឹងមានលក់ ក្នុងជម្រើសពណ៌ដូចជា ទឹកមាស, ខ្មៅ, ខៀវ និងពណ៌បៃតង ជាមួយតម្លៃប្រហែល ២៩៥ដុល្លារ ចាប់ពីថ្ងៃទី៩ ខែមិថុនាក្រោយនេះ នៅលើទីផ្សារចិនមុនគេ។ ចំណែក Gionee S10B វិញ ក៏នឹងមានលក់នៅទីផ្សារចិនក្នុងថ្ងៃតែមួយដែរ ដែលមានតម្លៃ ២៤៩ដុល្លារ។ Gionee S10C នឹងមានលក់ក្នុងតម្លៃ ២៣៣ដុល្លារចាប់ពីថ្ងៃនេះតទៅ៕
ប្រែសម្រួល៖ រឹទ្ធិរាជ
ប្រភព៖ gsmarena
