ថ្មីៗនេះ ក្រុមហ៊ុន Asus ទើបបានប្រកាសចេញនូវសមិទ្ធផលថ្មីមួយចំនួននៅក្នុងពិព័រណ៍ Computex 2017 ហើយក្នុងនោះ មាននូវកុំព្យូទ័រ Notebook ស៊េរីថ្មីគួរឱ្យចាប់អារម្មណ៍មួយម៉ូដែលគឺ ZenBook Flip S ដែលមានអេក្រង់អាចបត់ទៅក្រោយធ្វើដូចជាថេប្លេតបាន។
Asus ZenBook Flip S មានលក្ខណៈ ពិសេសជា កុំព្យូទ័រមានកម្រាស់ស្ដើងត្រឹមតែ ១០,៩មិល្លីម៉ែត្រ ហើយបំពាក់ដោយអង្គប្រតិបត្តិជំនាន់ចុងក្រោយ Intel Core i7 អមដោយអង្គផ្ទុកទិន្នន័យទំហំ 1TB។កុំព្យូទ័រទំនើបអាចបត់អេក្រង់ ៣៦០ដឺក្រេនេះ ដំណើរការដោយប្រព័ន្ធប្រតិបត្តិការ Windows 10 ប្រើ CPU: Core i7 ជំនាន់ទី៧ គឺ 7500U និង ultrafast 1TB PCIe SSD។ ZenBook Flip S ត្រូវបានឌីហ្សាញបញ្ចូលប្រព័ន្ធរក្សាភាពត្រជាក់បានល្អ (cooling system) ដោយប្រើសមាសធាតុដូចជា កង្ហារភ្ជាប់ liquid-crystal-polymer ដែលមានអាចបញ្ចេញខ្យល់ក្ដៅបានល្អ មានកម្រាស់ ០,៣មិល្លីម៉ែត្រ។
បើតាមការបញ្ជាក់ពីប្រធានក្រុមហ៊ុន Asus លោក Jonney Shih ឱ្យដឹងថា វាជាកុំព្យូទ័រដែលអាចប្ដូររូបរាង (convertible) ស្ដើងបំផុតលើលោក។ ZenBook Flip S មានអេក្រង់ទំហំ ១៣,៣អ៊ីញ មានកម្រាស់ស្ដើងត្រឹម ១១មិល្លីម៉ែត្រ គឺស្ដើងជា MacBook Air ដែលមានកម្រាស់ ១៧មិល្លីម៉ែត្រ ២០% និងមានទម្ងន់ត្រឹម ២,៤២ផោន ឬប្រហែល ១,១គីឡូក្រាម។
ពិសេសទៀតនោះ ZenBook Flip S ប្រើប្រាស់អេក្រង់ 4K UHD multitouch NanoEdge ត្រូវបានឌីហ្សាញស្អាតទាក់ទាញ។ កុំព្យូទ័រទំនើបនេះ ថែមទាំងបំពាក់ទ្រនាប់ស្កេនក្រយៅដៃទំហំតូចបំផុត បើប្រៀបធៀបនឹងទ្រនាប់ស្កេនក្រយៅដៃនៅលើកុំព្យូទ័រនានា គឺមាន 16x3.6mm ស្កេនដើម្បីភ្ជាប់តាមមុខងារ Windows Hello។ ZenBook Flip S នេះ មានកម្លាំងថ្មអាចប្រើបាន ១១,៥ម៉ោង (សម្រាប់ម៉ូដែល Core i7) មានរន្ធតំណភ្ជាប់ USB Type-C។
កំំព្យូទ័រប្រភេទ 2-in-1 ទំនើបរបស់ Asus នេះនឹងមានលក់ចាប់ពីខែកញ្ញាខាងមុខ ក្នុងតម្លៃចាប់ពី ១០៩៩ដុល្លារអាមេរិក៕
ប្រែសម្រួល៖ រឹទ្ធិរាជ
ប្រភព៖ Asus
