ស្ថាបនិកបង្កើត Android សម្ពោធស្មាតហ្វូនទំនើបប្លែកភ្នែក Essential គែមស្ដើងមិនចាញ់ Galaxy S8 តម្លៃ ៧០០ដុល្លារ
ក្រោយមានការបង្ហើបរូបស្មាតហ្វូន Essential របស់លោក Andy Runbin កាលពីខែមីនាកន្លងទៅ ទីបំផុតពេលនេះវាត្រូវបាន សហស្ថាបនិកអ្នកបង្កើតប្រព័ន្ធ Android ឱ្យយើងប្រើប្រាស់នៅលើស្មាតហ្វូនសព្វថ្ងៃនេះ សម្ពោធ Essential ជាផ្លូវការហើយ។ Essential មានការលើកឡើងថា ជាទូរស័ព្ទទំនើប ត្រូវបានសម្រិតសម្រាំងបំពាក់មកជាមួយ hardware សមត្ថភាពខ្ពស់ អមដោយមុខងារមួយចំនួន ដែលអាចប្រកួតប្រជែងនឹងស្មាតហ្វូនស៊េរីខ្ពស់របស់ Samsung, Apple និង Google បាន។
ស្មាតហ្វូនចេញថ្មីរបស់លោក Andy Rubin ខាងលើ ត្រូវបានបំពាក់បន្ទះឈីប Qualcomm Snapdragon 835, RAM 4GB, USB Type-C, កម្លាំងថ្ម 3040mAh និងមានមេម៉ូរី 128GB ប្រភេទ UFS 2.0។ មិនដូចទៅនឹងស្មាតហ្វូនទំនើបៗបច្ចុប្បន្នដែលផលិតពីសារធាតុអាលុយមីញ៉ូមនោះទេ ដោយ Essential គឺបានផលិតពីសារធាតុទីតាញ៉ូម និងសេរ៉ាមិក មានន័យជា វារឹតតែមានភាពធន់ខ្លាំងជាងមុន ទៅលើការប្រើប្រាស់ ក៏ដូចជាធន់នឹងការធ្លាក់ជាងមុន។ វាថែមទាំងមានរូបរាងស្រលូន និងរលោង ហើយពុំមានបិទរូបឡូហ្គោនោះទេ។
ស្មាតហ្វូន Essential នឹងមានទំហំអេក្រង់ ៥,៧អ៊ីញ កម្រិត 2560x1312 QHD (503ppi) ហើយមានលក្ខណៈដូចជាស្មាតហ្វូនទូទៅដែរ ដោយមានកម្រិតបង្ហាញរូប 19:10 display និងមានគែមអេក្រង់ស្ដើង edge-to-edge។ យើងសង្កេតឃើញគែមអេក្រង់របស់ Essential ហាក់ស្ដើងជាង Galaxy S8 បន្តិច នៅផ្នែកខាងលើ ហើយមានកាមេរ៉ាមុខទំហំតូចមួយនៅចំកណ្ដាលផ្នែកខាងលើនោះ។
អ្វីដែលគួរចាប់អារម្មណ៍ផ្សេងទៀតនៅលើស្មាតហ្វូន Essential គឺវា ត្រូវបានឌីហ្សាញឱ្យមានលក្ខណៈជាម៉ូឌុលដែលអាច ឱ្យឧបករណ៍បន្សំខាងក្រៅ មកភ្ជាប់ប្រើជាមួយវាបាន ជាក់ស្ដែងគឺកាមេរ៉ា ៣៦០ដឺក្រេ ដែលមានសមត្ថភាពអាចថតវីដេអូកម្រិត UHD នៅ 30fps បាន ហើយក៏មានដុំ charging dock អាចប្រើជាមួយ Essential ផងដែរ។
លេនកាមេរ៉ានៅលើ Essential ត្រូវបានឌីហ្សាញឱ្យមានលក្ខណៈរាបស្មើទៅនឹងតួទូរស័ព្ទ និងមានកាមេរ៉ាភ្លោះ dual camera នៅខាងក្រោយ ទំហំ 13MP CIS និង monochrome CIS ដែលជួយបន្ថែមពន្លឺក្នុងការថតរូបនៅទីងងឹតបានច្បាស់។ ចំណែកកាមេរ៉ាមុខរបស់វាមានទំហំ 8MP ដែលអាចថតវីដេអូកម្រិត 4K ទាំងកាមេរ៉ាមុខ និងក្រោយ។
លក្ខណៈសម្បត្តិផ្សេងទៀតនោះ គឺថា អេក្រង់ Essential បានក្រាលដោយកញ្ចក់ការពារ Gorilla Glass 5 ដំណើរការដោយប្រព័ន្ធប្រតិបត្តិការ Android Nougate 7.1.1 មានទ្រនាប់ស្កេនក្រយៅដៃនៅខាងក្រោយរាងមូល ដូចជា Google Pixel ដែរ និងមាន Bluetooth 5.0។ ដូចទៅនឹង iPhone 7 និង 7 Plus ដែរ ដោយ Essential ពុំមានរន្ធកាស headphone jack នោះទេ ប៉ុន្តែមាននូវដុំបន្ត USB C-to-3.5mm adapter សម្រាប់ប្រើជាមួយស្ទើរគ្រប់កាសត្រចៀកបាន។
ស្មាតហ្វូន Essential ត្រូវបានដាក់ឱ្យកុម្ម៉ង់ទិញចាប់ពីថ្ងៃនេះ ជាមួយតម្លៃ ៦៩៩ដុល្លារ ឬ ៧៤៩ដុល្លារ ប្រសិនអ្នកចង់បានគ្រឿងបន្សំដែលជាកាមេរ៉ា ៣៦០ដឺក្រេ។ មិនទាន់មានការបញ្ជាក់អំពីកាលបរិច្ឆេទចេញលក់លើទីផ្សារនៅឡើយ៕
ប្រែសម្រួល៖ រឹទ្ធិរាជ
ប្រភព៖ techspot
