ថ្មីៗ​នេះ គេ​បាន​ឃើញ​ការ​ធ្វើធេស្ត​និង​ដាក់​ពិន្ទុ Geekbench ​លើ​ស្មាតហ្វូន Nokia ថ្មី ដែល​គេ​អះអាង​ថា មាន​ម៉ូដែល Nokia 9 ​ហើយ​ឥឡូវ​នេះ វា​ថែមទាំង​បាន​បង្ហាញ​នៅ​លើ​គេហទំព័រ​ធ្វើតេស្ត AnTuTu Benchmarks ផង​ដែរ។

Nokia 9 ​ត្រូវ​បាន​បញ្ចូល​ទៅ​ក្នុង​ការ​ធ្វើតេស្ត AnTuTu ​អម​ដោយ​ការ​អះអាង​លក្ខណៈ​សម្បត្តិ​ជាច្រើន អំពី​ស្មាតហ្វូន​ថ្មី​របស់​ក្រុមហ៊ុន​ហ្វាំងឡង់​នេះ។ វា​នឹង​ប្រើប្រាស់​បន្ទះ​ឈីប Qualcomm Snapdragon 835 ​អម​ដោយ​ក្រាហ្វិក Adreno 540 GPU។ ​ទូរស័ព្ទ​អាថ៌កំបាំង​នេះ ថែមទាំង​ត្រូវ​បាន​បញ្ជាក់​ទៅ​លើ​អេក្រង់​ទូរស័ព្ទ គឺ​មាន​កម្រិត Quad HD ជាមួយ resolution 2560x1440 ​ខណៈ​អេក្រង់​ត្រូវ​គេ​រំពឹង​ថា អាច​មាន​ទំហំ ៥,៣អ៊ីញ។

គំរូ Nokia 9

​ដូច​ប្រិយមិត្ត​បាន​លេចឮ​ដំណឹង​អំពី​ស្មាតហ្វូន​ថ្មី Nokia 9 ​រួច​មក​ហើយ វា​នឹង​បំពាក់​កាមេរ៉ា​ចំនួន​ពីរ​គ្រាប់ (dual camera) នៅ​ខាង​ក្រោយ ដែល​មាន​ទំហំ 13MP ​តែ​មិន​ច្បាស់​អំពី​កាមេរ៉ា​មុខ​នោះ​ទេ។ Nokia 9 ​ត្រូវ​បាន​សរសេរ​បញ្ជាក់​ថា បាន​បែងចែក​ជា​ពីរ​ម៉ូដែល​គឺ RAM 4GB អម​ដោយ​មេម៉ូរី 64GB និង​ម៉ូដែល​មាន RAM 8GB អម​ដោយ​មេម៉ូរូ​ទំហំ 128GB។ គេ​រំពឹង​ថា Nokia 9 ​នឹង​ត្រូវ​សម្ពោធ​ចេញ​ផ្លូវការ​ក្នុង​ខែ​មិថុនា​នេះ ដែល​វា​នឹង​ដំណើរការ​ដោយ​ប្រព័ន្ធ​ប្រតិបត្តិការ Android 7.1.1 Nougat៕ ​ប្រែ​សម្រួល៖ រឹទ្ធិរាជ ប្រភព៖ The Android Soul