គំនិតដ៏សែនអាក្រក់៣យ៉ាងដែលអ្នកត្រូវតែបោះបង់ចោល ប្រសិនជាអ្នកចង់ជោគជ័យ
ជាទូទៅ មនុស្សច្រើនតែមានកម្លាំងចិត្តនឹងខិតខំនាពេលចាប់ផ្តើមដំបូងតែប៉ុណ្ណោះ តែផុតប៉ុន្មានថ្ងៃទៅ គំនិតអវិជ្ជមានចេះតែមក ហើយវាធ្វើឲ្យអ្នកចាប់ផ្ដើមងឿងឆ្ងល់ពីភាពជោគជ័យនិងគិតថាខ្លួនឯងមិនអាចធ្វើវាបានឡើយ។ លើសពីនេះ អ្នកខ្លាចភាពបរាជ័យ អ្នកខ្លាចវាមិនស័ក្ដិសមនឹងការខំប្រឹងរបស់អ្នក។ ដូច្នេះហើយ អ្នកត្រូវតែបំបាត់គំនិតខាងក្រោមនេះឲ្យបានប្រសិនជាអ្នកចង់ជោគជ័យ៖
១) អ្នកនឹងមិនជោគជ័យទេ៖ ជាការពិតណាស់ នរណាម្នាក់ក៏ខ្លាចភាពបរាជ័យដែរ ហើយអ្នកខ្លាចមានបទពិសោធន៍ដូចមនុស្សពីមុនដែលធ្លាប់ខំប្រឹងហើយបរាជ័យ។ ប៉ុន្តែ ចូរអ្នកកុំភ្លេចគិតថាអ្នកអាចសិក្សាពីកំហុសដែលមនុស្សពីមុនធ្លាប់មានហើយជៀសវាងវាឲ្យបាន។ ត្រូវចងចាំថា ចំណុចចាប់ផ្តើមតែងតែពិបាក ប៉ុន្តែដរាបណា អ្នកនៅខំប្រឹង នៅតស៊ូ នៅព្យាយាម អ្នកប្រាកដជាជោគជ័យនៅថ្ងៃណាមួយ។
២) អ្នកកំពុងតែខ្ជះខ្ជាយពេលវេលា៖ អ្នកប្រហែលជាខំប្រឹងលើគម្រោងឬក្តីសុបិនរបស់អ្នកឲ្យជាច្រើនឆ្នាំមកហើយ តែអ្នកនៅតែមិនទាន់ជោគជ័យទៀត។ អ្នកចាប់ផ្តើមមានគំនិតថាអ្នកកំពុងតែខ្ជះខ្ជាយពេលវេលាទៅធ្វើអ្វីដែលមិនផ្តល់ផលតបស្នងមកវិញ។ ប៉ុន្តែ ភាពជោគជ័យមិនកើតឡើងក្នុងរយៈមួយយប់ឡើយ។ ដូច្នេះហើយ ដរាបណាអ្នកមានគោលបំណងច្បាស់លាស់ អ្នកមិនកំពុងខ្ជះខ្ជាយពេលវេលាឡើយ។
៣) វាគង់តែបរាជ័យទេ៖ ទម្រាំដើរមកដល់ថ្ងៃនេះ អ្នកប្រហែលជាបានខិតខំនិងជួបឧបសគ្គអស់ជាច្រើន។ ប៉ុន្តែ អ្នកចាប់ផ្តើមទទួលស្គាល់គំនិតមួយថាអ្នកកំពុងតែប្រើប្រាស់និងលួមលោមខ្លួនឯងហើយ។ អ្នកបានខិតខំយូរហើយ ហេតុអ្វីបានជាអ្នកនៅតែមិនទាន់ជោគជ័យឬមួយក៏ក្តីសុបិនពិតជាមិនអាចទៅរួម?? អ្នកចាប់ផ្តើមមានមន្ទិលសង្ស័យចំពោះខ្លួនឯងនិងក្តីសុបិន។ ប្រសិនជាអ្នកពិតជាចង់ជោគជ័យមែន ធ្វើអ្វីគ្រប់យ៉ាងដែលនាំឲ្យអ្នកឆ្ពោះទៅរកភាពជោគជ័យ៕
ប្រែសម្រួល៖ អុឹង មុយយូ ប្រភព៖ addicted2success.com
