ខាងក្រោមនេះគឺជា គន្លឹះ និងល្បិចក្នុងការចាប់ផ្ដើមប្រើ iPhone ស៊េរីថ្មី ប្រកបដោយភាពឆ្លាតវៃ និងដើម្បីទទួលបានបទពិសោធន៍ខ្ពស់។ (បញ្ជាក់៖ គន្លឹះជាច្រើនខាងក្រោមនេះ ក៏អាចដំណើរការបាននៅលើម៉ូដែល iPhone ស៊េរីចាស់ៗដែរ)។
១) ដើម្បីចង់ដឹង និងបើកចូលទៅ contacts ដែលអ្នកទើបបានបើកចុងក្រោយបំផុត (recent contact) ដូច្នេះអ្នកគ្រាន់តែចុចលើប៊ូតុង Home ចំនួន ២ដងជាប់ៗគ្នាឱ្យរហ័ស។ អ្នកនឹងឃើញបញ្ជីនៃឈ្មោះ contact បង្ហាញឡើងនៅផ្នែកខាងលើនៃអេក្រង់ (screen)។
២) ដំឡើងមុខងារ Apply Pay ដោយបើកចូល Passbook app។ អ្នកនឹងត្រូវសួរឱ្យបញ្ចូលព័ត៌មានកាតឥណទានរបស់អ្នក។ បន្ទាប់ពីនោះ អ្នកនឹងអាចបង់ប្រាក់ទិញទំនិញតាមហាង ឬផ្សារទំនើបដែលជាដៃគូគាំទ្រមុខងារនេះបាន ដោយគ្រាន់តែដាក់ទូរស័ព្ទនៅជិតម៉ាស៊ីន terminal។
៣) បន្ថែម keyboard ដោយខ្លួនឯង ដោយទាញយក (download) ពី App Store (ក្នុងនោះក៏មាន keyboard ខ្មែរដែរ)។ បន្ទាប់មក សូមចូលទៅ Settings → General → Keyboard → Add New Keyboard រួចហើយជ្រើសរើស Keyboard ខ្មែរ ឬ keyboard ណាមួយដែលអ្នកចង់ប្រើជាការស្រេច។
៤) បើកសេវាកម្ម iCloud Drive ដើម្បី back up ឯកសារ (file និង document) ជាលក្ខណៈអនឡាញ។ នៅពេលដំណើរការសេវាកម្មនេះហើយ អ្នកនឹងអាចភ្ជាប់ឯកសារទាំងនោះ តាមកុំព្យូទ័រ Mac ឬ iPad បានងាយស្រួលដោយទោះទៅដល់ទីណាក៏ដោយ ឱ្យតែមានអ៊ីនធឺណិត។ ដើម្បីដំណើរការបាន សូមចូលទៅ Settings → iCloud → iCloud Drive រួចហើយបើក enable។
៥) លោកអ្នកអាចផ្លាស់ប្ដូរសំឡេងលើមុខងារ Siri ពីសំឡេងមនុស្សស្រីទៅជាសំឡេងមនុស្សប្រុសវិញបាន ដោយចូលទៅ Settings → General → Siri → Voice Gender រួចហើយរើសយក Male។
៦) គន្លឹះងាយស្រួលក្នុងការបើក Siri ឱ្យដំណើរការ ដោយគ្រាន់តែលោកអ្នកនិយាយថា “Hey Siri” ប៉ុណ្ណោះ។ ដើម្បីបើកមុខងារនេះ ត្រូវចូលទៅ Settings → General → Siri រួចបើក enable នៅត្រង់ “Hey Siri”។
៧) ប្រសិនលោកអ្នកមានកុំព្យូទ័រ Mac ដែលដំណើរការដោយប្រព័ន្ធប្រតិបត្តិការជំនាន់ចុងក្រោយគឺ Yosemite អ្នកអាចប្រើមុខងារ Handoff របស់ Apple។ មុខងារនេះអាចឱ្យអ្នកភ្ជាប់ទំនាក់ទំនងរវាង iPhone ជាមួយម៉ាស៊ីន Mac បាន មានន័យថា អ្នកអាចដំណើរការកម្មវិធីផ្សេងៗនៅលើឧបករណ៍តែមួយ។ សកម្មភាពបើកដំណើរការ app ផ្សេងៗនៅលើ iPhone នឹងបញ្ជូនទៅម៉ាស៊ីន Mac អាចមើលដឹងបានថាអ្នកកំពុងធ្វើអ្វី។ ដើម្បីបើកមុខងារនេះ សូមចូលទៅ Settings → Handoff & Suggested Apps រួចហើយបើក enable ជាការស្រេច។
៨) ប្រសិនអ្នកមិនចង់លេងស្ទីលទម្រង់ម៉ូដ animations នៅពេលអ្នកបើកកម្មវិធី ឬបិទកម្មវិធី (open ឬ close app) អ្នកអាចបិទបាន។ ម្យ៉ាងធ្វើដូចនេះក៏អាចជួយឱ្យ iPhone ដំណើរការបានលឿន និងសន្សំសំចៃថ្មផងដែរ។ ដើម្បីបើក ត្រូវចូលទៅ Settings → General → Accessibility → Reduce Motion រួចហើយបើក enable ជាការស្រេច។
៩) iPhone 6 និង iPhone 6 Plus មានអេក្រង់ធំជាងមុន អាចធ្វើឱ្យអ្នកប្រើដែលមានប្រអប់ដៃតូច ពិបាកក្នុងការកាន់ដៃម្ខាង។ ដូច្នេះអ្នកអាច tab ស្រាលៗ (កុំចុច press) លើប៊ូតុង Home ដើម្បីប្ដូរទម្រង់បញ្ជីកម្មវិធី (app) ឱ្យធ្លាក់ចុះ នៅសល់ប្រហែលពាក់កណ្ដាលចុះក្រោម (ដូចរូប)។
១០) ប្រសិនអ្នកមានសមាជិកគ្រួសារប្រើ iPhone ដូចគ្នា អ្នកអាចចែករំលែក (share) បទចម្រៀង វីដេអូ និងរូបថតបានយ៉ាងងាយស្រួល ដោយគ្រាន់តែបើកមុខងារ Family Sharing។ ចូលទៅ Settings → iCloud → Set Up Family Sharing → Get Started → Continue → Continue។
១១) កម្មវិធីជាច្រើននាពេលបច្ចុប្បន្នគឺមាននូវ widgets។ អ្នកអាចបន្ថែម widgets ទៅក្នុងបញ្ជី notifications បានដើម្បីងាយស្រួលបើកកម្មវិធីបានរហ័ស ដោយគ្រាន់តែអូសផ្ទាំងពីលើអេក្រង់។ សូមអូសផ្ទាំងពីអេក្រង់ចុះក្រោម ចូលទៅ "Today" tab រួចហើយរំកិលចុះក្រោមដើម្បីរកមើល និងចុចលើប៊ូតុង “Edit” ដើម្បីគ្រប់គ្រង អាចលុប (delete) ឬបន្ថែម (add) Widgets បាន។
១២) អ្នកអាចយកកម្មវិធី (app) ថ្មីៗបានដោយស្វ័យប្រវត្តិមិនចាំបាច់ចូលទៅ App Store ក៏បាន។ ត្រូវចូលទៅ Settings → iTunes & App Store រួចហើយបើក enable ត្រង់ “App”។
១៣) អ្នកអាចកំណត់ឱ្យ iPhone 6 ឬ iPhone 6 Plus ធ្វើការខលទូរស័ព្ទដោយប្រើប្រាស់អ៊ីនធឺណិត (data connection) ជំនួយឱ្យការប្រើសេវាទូរស័ព្ទធម្មតា (voice connection)។ ធ្វើដូចនេះគឺអាចធ្វើឱ្យការសន្ទនាប្រកបដោយគុណភាពសំឡេងខ្ពស់ តែក៏អាស្រ័យលើល្បឿនអ៊ីនធឺណិត (data plan) ដែរ។ ដើម្បីដំណើរការ សូមចូលទៅ Settings → Cellular → Enable LTE រួចហើយធីកយក “Voice & Data” ដើម្បីបើក។
១៤) (សម្រាប់បរិបទស្រុកគេ នៅអាមេរិក) ប្រសិនសេវាទូរស័ព្ទរបស់អ្នកខ្សោយ អ្នកអាចខលទូរស័ព្ទតាម Wi-Fi បាន តែចំពោះតែ iPhone 6 និង iPhone 6 Plus ប៉ុណ្ណោះ។ ដើម្បីដំណើរការ សូមចូលទៅ Settings → Phone → Wi-Fi Calls រួចហើយបើក enable ជាការស្រេច។ (បញ្ជាក់៖ នៅអាមេរិកមុខងារដំណើរការបានតែសេវាកម្មរបស់ T-Mobile ប៉ុណ្ណោះ ប៉ុន្តែសេវារបស់ក្រុមហ៊ុនផ្សេងៗទៀតនឹងបញ្ចូលក្នុងពេលឆាប់ៗខាងមុខ)។
១៥) ប្រើ iPhone 6/6 Plus ប្រកបដោយបទពិសោធន៍ខ្ពស់ជាមួយមុខងារពង្រួម (zoom)។ ដោយប្រើមុខងារ Zoom នេះគឺអាចពង្រីករូប icon កម្មវិធី (app icon) និងអក្សរមួយចំនួនបានធំជាងមុន។ ដើម្បី Zoom សូមចូលទៅ Settings → Display & Brightness → View ហើយជ្រើសរើស “Zoomed”។
១៦) អ្នកអាចស្វែងរក app, contacts, music, email បានរហ័សដោយប្រើមុខងារ Spotlight។ ដើម្បីបង្ហាញរបារស្វែងរក (search bar) អ្នកគ្រាន់តែ ដាក់ម្រាមដៃនៅលើ screen (ចាប់ពីពាក់កណ្ដាល screen ឡើងលើ) ហើយចាប់អូសពីលើចុះក្រោម។
១៧) អ្នកអាចឆ្លើយតបសារ ដោយមិនចាំបាច់បើកចូលកម្មវិធី Message app ក៏បាន។ នៅពេលអ្នកទទួលបាន notifications ថ្មីដែលជាសាររបស់មិត្តភ័ក្ដិស្ថិតនៅកំពូលនៃ screen ទូរស័ព្ទ ដូច្នេះអ្នកគ្រាន់តែអូសចុះក្រោមបន្តិច នោះនឹងឃើញមានប្រអប់ឆ្លើយតបសារតូចមួយនៅផ្នែកខាងលើ៕
