​ស្មាតហ្វូន OnePlus 5 នឹង​ត្រូវ​បង្ហាញ​ខ្លួន​ជា​សាធារណៈ​នៅ​ថ្ងៃ​ទី២០ ខែ​មិថុនា​នេះ។ នេះ​បើ​ផ្អែក​តាម​ការ​បង្ហោះ​របស់​គណនី Twitter ឈ្មោះ Evan Blass។ ក្រុមហ៊ុន OnePlus នឹង​មាន​ព្រឹត្តិការណ៍ ណែនាំ​ចេញ​ស្មាតហ្វូន​កំពូល​របស់​ខ្លួន នៅ​ថ្ងៃ​ទី២១ ក្នុង​ប្រទេស​ចិន ហើយ​ថ្ងៃ​ទី២២ បន្ទាប់​នឹង​ត្រូវ​សម្ពោធ​លើ​ទីផ្សារ​ឥណ្ឌា។ ស្របពេល​កាលបរិច្ឆេទ​សម្ពោធ​ស្មាតហ្វូន​ថ្មី​របស់​ក្រុមហ៊ុន​ចិន​នេះ ត្រូវ​ទម្លាយ​ចេញ គេ​ក៏​គេ​បាន​អះអាង​ថា OnePlus 5 ដែល​ជា​ទាយាទ​ក្រោយ​របស់ OnePlus 3 នឹង​ បង្ហាញ​ខ្លួន​អម​ជាមួយ RAM ​ដល់​ទៅ 8GB។

​ស្មាតហ្វូន OnePlus 5 ​នឹង​មាន​លក់​ក្នុង​ថ្ងៃ​តែមួយ ពេល​ក្រុមហ៊ុន​ប្រកាស​ចេញ​ផ្លូវការ គឺ​នៅ​ថ្ងៃ​ទី២២ មិថុនា។ ការ​អះអាង​នេះ គឺ​ចេញ​ពី​ក្រុមហ៊ុន Amazon ប្រចាំ​នៅ​ឥណ្ឌា ដែល​នឹង​មាន​លក់​លើ​ទីផ្សារ​ឥណ្ឌា​ផ្ទាល់ ចាប់ពី​ថ្ងៃ​សម្ពោធ​នោះ​តែម្ដង។ ក្រុមហ៊ុន​បាន​បង្ហើប​ចេញ​ទំព័រ​មួយ​សម្រាប់​ស្មាតហ្វូន OnePlus 5 ​អម​ជាមួយ​ការ​បញ្ជាក់​អំពី​កាលបរិច្ឆេទ (រូប​ខាងលើ)។ ស្មាតហ្វូន​ថ្មី​នេះ នឹង​មាន​ RAM ដល់ 8GB បំពាក់​ដោយ​អង្គ​ប្រតិបត្តិ Snapdragon 835 ​ដែល​នឹង​ត្រូវ​ធ្វើ​បទបង្ហាញ​ដោយ​នាយក​ប្រតិបត្តិ OnePlus ផ្ទាល់។ ចចាមអារ៉ាម​មួយ​ចំនួន បាន​លើកឡើង​ថា OnePlus 5 ក៏​នឹង​បង្ហាញ​ខ្លួន​ជាមួយ​ជម្រើស​ម៉ូដែល RAM 6GB ​ផង​ដែរ ក្រៅពី RAM 8GB ហើយ​នោះ។ OnePlus 5 នឹង​មាន​រូបរាង​ប្រហាក់ប្រហែល​ជាមួយ iPhone 7 Plus យ៉ាង​ហោច​មាន​ផ្ទៃ​ខាង​ក្រោយ​ដូច​ច្រើន​ទៅ​នឹង​ទូរស័ព្ទ​របស់ Apple។ OnePlus 5 ​នឹង​ត្រូវ​បង្កប់​មុខងារ​ស្កេន​ក្រយៅដៃ fingerprint ​នៅ​ផ្នែក​ខាង​មុខ ហើយ​អាច​មាន​គែម​ទូរស័ព្ទ​កាន់តែ​ស្ដើង​ជាង​មុន គឺ​ស្ដើង​ជាង OnePlus 3T៕ ​ប្រែ​សម្រួល៖ រឹទ្ធិរាជ ប្រភព៖ .gsmarena