ខណៈ iPhone 8 ​កំពុង​មាន​ចចាមអារ៉ាម​ពេញ​ទំហឹង អំពី​ការ​ផ្លាស់ប្ដូរ​ដ៏​ខ្លាំង លើ​រចនាបថ និង​ល្បី​ថា អាច​ផ្លាស់ប្ដូរ​បច្ចេកទេស​នៃ​ការ​បំពាក់​ទ្រនាប់​ស្កេន​ក្រយៅដៃ ឱ្យ​មក​នៅ​ក្រោម​កញ្ចក់​អេក្រង់ ជាជាង​ការ​ប្រើ​នៅ​លើ​ប៊ូតុង Home។ យ៉ាងណា ទន្ទឹម​នេះ ក៏​មាន​ដំណឹង អំពី​ស្មាតហ្វូន​របស់​ក្រុមហ៊ុន​មួយ​ទៀត គឺ Vivo ដែល​មាន​ចចាមអារ៉ាម​ថា នឹង​ទំនើប​មិន​ចាញ់ iPhone ហើយ​មាន​ចំណុច​ដូច​គ្នា​នេះ គឺ​បង្កប់​ទ្រនាប់​ស្កេន​ក្រយៅដៃ​ក្រោម​អេក្រង់​ទូរស័ព្ទ។

ជាក់ស្ដែង​ថ្មីៗ​នេះ មាន​លេច​ចេញ​វីដេអូ​ឃ្លីប​មួយ បង្ហាញ​អំពី​ការ​សាកល្បង បើក​សោ​ទូរស័ព្ទ​លើ​ស្មាតហ្វូន Vivo ជំនាន់​ថ្មី ដោយ​ធ្វើ​ការ​ស្កេន​ក្រយៅដៃ​នៅ​លើ​កញ្ចក់​អេក្រង់​ទូរស័ព្ទ។ ក្រុមហ៊ុន Vivo ឆាប់ៗ​នេះ នឹង​សម្ពោធ​ចេញ​ស្មាតហ្វូន​ស៊េរី​ថ្មី បង្កប់ Fingerprint Scanner ​ក្រោម​អេក្រង់ មុន​វត្តមាន iPhone 8 ​ទៅ​ទៀត។ ប្រភព​ដដែល​បង្ហើប​ថា ​នឹង​មាន​ការ​ធ្វើ​បទបង្ហាញ​ស្មាតហ្វូន​ថ្មី​ទំនើប​នៅ​ព្រឹត្តិការណ៍ MWC ​ក្នុង​ទីក្រុង​សៀងហៃ ចាប់ពី​ថ្ងៃ​ទី២៨ មិថុនា​នេះ (គឺ​បាន​ន័យ​ថា មិនមែន​មាន​ព្រឹត្តិការណ៍ MWC តែម្ដង ក្នុង​មួយ​ឆ្នាំ​នោះ​ទេ)។ https://youtu.be/kZA-Y6Koy7Y តាម​វីដេអូ​នេះ ឃើញ​ថា ស្មាតហ្វូន​ពិត​ជា​ទនើប គឺ​បាន​បង្កប់​ទ្រនាប់​ស្កេន​ក្រយៅដៃ​នៅ​ក្រោម​កញ្ចក់ ដែល​គេ​អាច​ប៉ះ​ស្កេន​បាន​យ៉ាង​រហ័ស។ វីដេអូ​នេះ ហាក់​ជា​ការ​ធ្វើតេស្ត​របស់ Vivo ​ទៅ​លើ​គំរូ​បឋម (prototype) ​សម្រាប់​ស្មាតហ្វូន​ថ្មី​របស់​ខ្លួន​រួច​រាល់​ហើយ ក្នុង​នោះ​ក៏​មាន fingerprint scanner ​ដូច​ដែល​បាន​លេច​ចេញ​នៅ​ក្នុង​រូប​បែកធ្លាយ។ ​អ្នក​វិភាគ​ចិន​ដ៏​ល្បី​ឈ្មោះ បាន​លើកឡើង​ថា Vivo នឹង​ចេញ​ទូរស័ព្ទ​ថ្មី​ នៅ​ថ្ងៃ​ទី២៨ មិថុនា​ខាង​មុខ ហើយ​ទូរស័ព្ទ នឹង​ត្រូវ​បាន​ឌីហ្សាញ​ទំនើប​ប្លែក ជាមួយ​បច្ចេកទេស​នៃ​ការ​ដោះសោ​ថ្មី។ យ៉ាងណា Apple នៅ​តែ​ត្រូវ​គេ​រំពឹង​ទុក​ថា នឹង​សម្ពោធ​ចេញ iPhone 8 អម​ដោយ​ការ​ឌីហ្សាញ​ថ្មី​ទំនើប បង្កប់​មុខងារ fingerprint នៅ​ក្រោម​កញ្ចក់​អេក្រង់ ហើយ​ Galaxy Note 8 ក៏​ដូច​គ្នា។ Galaxy Note 8 អាច​ត្រូវ​សម្ពោធ​ផ្លូវការ​នៅ​អំឡុង​ខែ​សីហា មុន​វត្តមាន iPhone 8៕ ​ប្រែ​សម្រួល៖ រឹទ្ធិរាជ ប្រភព៖ phonearena