យោងតាម​ទិន្នន័យ​ចេញ​ផ្សាយ​ដោយ​ក្រុមហ៊ុន​ស្រាវជ្រាវ​ចំណែកទីផ្សារ Strategy Analytics បង្ហាញ​ថា Apple បាន​ក្លាយ​ជា​ក្រុមហ៊ុន​លក់​នាឡិកា​ឆ្លាតវៃ គឺ Apple Watch ដាច់​ច្រើន​ជាង​គេ នៅ​ត្រីមាស​ទី១ ឆ្នាំ២០១៧ កន្លង​ទៅ ពោល​គឺ​ក្ដាប់​បាន ៥០% ទៅ ៥៣% នៃ​ចំណែកទីផ្សារ​ Smartwatch ទូទាំង​ពិភពលោក។ ចំណែក​ទីផ្សារ​ប៉ុណ្ណេះ បាន​ជួយ​ឱ្យ Apple ឈរ​លើ​តំណែង​លេខ​១ ជា​ក្រុមហ៊ុន​លក់​ចេញ​នាឡិកា​ឆ្លាតវៃ​ដាច់​ជាង​គេ​នៅ​ត្រីមាស​ទី១ ២០១៧។

ចំណែក​ក្រុមហ៊ុន​ដែល​ចែកចាយ Smartwatch បាន​ច្រើន​បន្ទាប់​ពី Apple គឺ​បាន​លើ Samsung ដែល​ក្ដាប់​ទីផ្សារ ១២,៨%។ ក្រុមហ៊ុន​អេឡិចត្រូនិក​យក្ស​កូរ៉េ​ខាង​ត្បូង​នេះ បាន​យក​ឈ្នះ​ក្រុមហ៊ុន Fitbit ជំនាញ​ខាង​ផលិត​ខ្សែដៃ​ត្រួតពិនិត្យ​សុខភាព គឺ​បាន ១២,២% ជាប់​លេខ៣។ របាយការណ៍​ដដែល​នេះ បាន​ឱ្យ​ដឹង​ថា នាឡិកា​នាំ​សំណាង​របស់ Samsung ដែល​ជួយ​ឱ្យ​ក្រុមហ៊ុន​ជាប់​លេខ២ នោះ ជា​ម៉ូដែល​នាឡិកា Gear S3។

ចំណែក​ឯ បើ​គិត​ពី​ការ​ចែកចាយ​លក់​នាឡិកា Smartwatch នៅ​លើ​ទីផ្សារ ធ្វើ​ឡើង​ដោយ​ក្រុមហ៊ុន​ផ្សេង បង្ហាញ​ថា Apple នៅ​តែ​ឈរ​លេខ​រៀង​ទី១ ក្ដាប់​បាន ១៦% ខណៈ​ដែល​លេខ២ និង​លេខ៣ គឺ​ក្រុមហ៊ុន Xiaomi និង Fitbit ដែល​បាន​ក្ដាប់​ចំណែកទីផ្សារ​រៀង​គ្នា​គឺ ១៥,៥% និង ១២,៣%៕   ​ប្រែ​សម្រួល៖ រឹទ្ធិរាជ ប្រភព៖ gsmarena