តាមការចុះផ្សាយនៅលើគេហទំព័រផ្លូវការរបស់ Volvo ផ្ទាល់ ឱ្យដឹងថា ក្រុមហ៊ុនផលិតរថយន្តរបស់ស៊ុយអែតនេះ បានកំពុងធ្វើការលើគម្រោងរថយន្តបើកបរស្វ័យប្រវត្តិ រយៈពេលកន្លងមក ហើយពេលនេះ ក្រុមហ៊ុនបានប្រកាសអំពី ការសហការថ្មីជាមួយក្រុមហ៊ុន NVIDIA ដើម្បីជំរុញអភិវឌ្ឍគម្រោង self driving car កាន់តែរលូនទៅមុខ។
ក្រុមហ៊ុន Volv ពេលនេះ កំពុងធ្វើការជាមួយក្រុមហ៊ុនចំនួនពីរគឺ Atoliv និង NVIDIA ក្នុងការអភិវឌ្ឍ hardware និង software ដើម្បីបំពាក់នៅលើរថយន្ត ឱ្យមានសមត្ថភាពពិសេស បើកបរដោយស្វ័យប្រវត្តិបាន។ ប្រធាន និងជានាយកប្រតិបត្តិរបស់ Volvo លោក Hakan Samuelsson បានលើកឡើងថា៖ “ការសហការគ្នាជាមួយ NVIDIA នេះ នឹងធ្វើឱ្យ Volvo Cars, Autoliv និង Zenuity មានសន្ទុះអភិវឌ្ឍរហ័ស ក្នុងការផលិតចេញរថយន្តស្វ័យប្រវត្តិជំនាន់ថ្មីៗ ដើម្បីប្រកួតប្រជែងទីផ្សារ”
រីឯលោក Jensen Huang នាយកប្រតិបត្តិរបស់ NVIDIA វិញ បានមានប្រសាសន៍ដែរថា៖ “ប្រាជ្ញាសិប្បនិម្មិត AI គឺជាកូនសោសំខាន់ សម្រាប់ដោះស្រាយបញ្ហាប្រឈមបាន ជាមួយភាពមិនគួរឱ្យជឿនៃការបង្កើតចេញប្រព័ន្ធបើកបរស្វ័យប្រវត្តិ។ យើងកំពុងសហការជាមួយក្រុមហ៊ុន Volvo Cars ដើម្បីបង្កើតរថយន្ត ផ្ដល់សុវត្ថិភាពខ្ពស់ដល់សាធារណជន ធ្វើឱ្យទីក្រុងពោរពេញដោយបម្រើបម្រាស់ថាមពលបៃតង ក៏ដូចជាកាត់បន្ថយការកកស្ទះចរាចរតាមដងផ្លូវបានថែមទៀត”។
Volvo អាចនឹងបង្ហាញចេញរថយន្តបំពាក់បច្ចេកវិទ្យាបើកបរស្វ័យប្រវត្តិរបស់ខ្លួន នៅឆ្នាំ២០២១ ខាងមុខ៕
ប្រែសម្រួល៖ រឹទ្ធិរាជ
ប្រភព៖ Volvo
