​យើង​បាន​ឮ​ដំណឹង​ចចាមអារ៉ាម​ជាច្រើន​រួច​មក​ហើយ អំពី​ទូរស័ព្ទ​ iPhone 8 ជំនាន់​ថ្មី​របស់ Apple ​ហើយ​ក៏​ធ្លាប់​បែកធ្លាយ​រូបរាង​ឌីហ្សាញ​ខ្លះៗ​ផង​ដែរ។ អ្វី​ដែល​សាធារណជន ចាប់អារម្មណ៍ និង​រំពឹង​ទុក​មុន​គេ គឺ​ទៅ​លើ​រូបរាង​ឌីហ្សាញ​ថ្មី​នៃ​កំពូល​ស្មាតហ្វូន​ត្រកូល iPhone នេះ​តែ​ម្ដង។

តាម​សេចក្ដី​រាយការណ៍​កន្លង​មក​អះអាង​ថា iPhone 8 ​នឹង​មាន​តួ​ជា​ដែក​អ៊ីណុក​ប្រភេទ stainless steel ​ហើយ​ក្រាល​ដោយ​កញ្ចក់​នៅ​ខ្នង​ទូរស័ព្ទ ក៏​ដូច​ជា​ផ្ទៃ​ខាង​មុខ ក្រាល​ដោយ​កញ្ចក់ OLED ​ស្ទើរ​គ្មាន​សល់​គែម​ទូរស័ព្ទ (edge to edge)។ ដោយសារ​មាន​សេចក្ដី​រាយការណ៍​ច្រើន​ហូរហែ ទើប​ធ្វើ​ឱ្យ​អ្នក​ឌីហ្សាញ​គំរូ​ទូរស័ព្ទ​ជាច្រើន​នាំ​គ្នា​និមិត្ត​ចេញ​ស្មាតហ្វូន​មិន​ទាន់​បង្ហាញ​ខ្លួន​ផ្លូវការ​នេះ។ ជាក់ស្ដែង​ថ្មីៗ​នេះ លោក Martin Hajek ​បាន​បង្អួត​គំរូ iPhone 8 ​ថ្មី​ គឺ​ពិត​ជា​ទំនើប ឃើញ​ស្រលាញ់​ភ្លែត​តែម្ដង។

iPhone 8 ​ថ្មី​នេះ មាន​ចចាមអារ៉ាម​ថា នឹង​បង្ហាញ​ខ្លួន​ផ្លូវការ​អម​ដោយ​អេក្រង់ OLED ​ពាស​ផ្ទៃ​ទូរស័ព្ទ​ខាង​មុខ​ស្ទើរ​ពេញ​តែម្ដង ពោល​វា​អាច​ជា​ទូរស័ព្ទ​មាន​គែម​យ៉ាង​ស្ដើង​បំផុត មិន​ចាញ់ Galaxy S8/ S8+ របស់ Samsung ទេ។ iPhone 8 ​រំពឹង​នឹង​បំបាក់​ឈីប​ជំនាន់​ថ្មី​គឺ Apple A11 មាន RAM ធំ​ជាង​មុន ​ក៏​ដូច​ជា​មាន​នូវ​លក្ខណៈ​សម្បត្តិ​កែលំអ កាន់តែ​មាន​សមត្ថភាព​ខ្ពស់​ជាង​មុន ទាំង​ប្រព័ន្ធ​កាមេរ៉ា​ភ្លោះ​ជំនាន់​ថ្មី ដែល​អាច​ត្រូវ​តម្រៀប​ក្នុង​ទម្រង់​បញ្ឈរ​វិញ។

ក្រុមហ៊ុន Apple ​ត្រូវ​គេ​រំពឹង​ថា នឹង​ប្រកាស​ចេញ iPhone 8 ​នៅ​អំឡុង​ខែ​កញ្ញា ​អម​ជាមួយ​ប្រព័ន្ធ​ប្រតិបត្តិការ iOS 11។ មិន​តែ​ប៉ុណ្ណោះ មាន​ការ​រំពឹង​ទៀត​ថា ក្រៅពី iPhone 8 ​Apple ក៏​នៅ​មាន iPhone ស៊េរី​ថ្មី​ពីរ​ម៉ូដែល​ទៀត ដែល​ប្រើ​ឈ្មោះ​ក្នុង​ត្រកូល iPhone 7 ​នៅ​ឡើយ គឺ iPhone 7s និង iPhone 7s Plus៕ ​ប្រែ​សម្រួល៖ រឹទ្ធិរាជ ប្រភព៖ Apple, Apple iPhone