រយៈពេល​ប៉ុន្មាន​ខែ​ចុងក្រោយ​នេះ ព័ត៌មាន​អំពី iPhone 8 របស់ Apple និង Galaxy Note 8 របស់ Samsung ពិត​ជា​ទទួល​បាន​ការ​ចាប់អារម្មណ៍ ទៅ​លើ​មុខងារ​ថ្មីៗ និង​រចនាបថ​ថ្មី ទោះបី​មិន​ទាន់​ត្រូវ​សម្ពោធ​ផ្លូវការ​ក៏​ដោយ។ Note 8 អាច​នឹង​ត្រូវ​ផលិត​យក​លំនាំ​តាម Galaxy S8 ​ដែល​ត្រូវ​ផ្លាស់ប្ដូរ​ទីតាំង​ទ្រនាប់​ស្កេន​ម្រាមដៃ​ទៅ​ខ្នង​ទូរស័ព្ទ​វិញ។ នេះ​បើ​តាម​ការ​អះអាង​ពី​គណនី​បណ្ដាញ​សង្គម twitter ឈ្មោះ Evan Blass។

​ចំណែក​ការ​អះអាង​ថ្មី​ចុងក្រោយ​នេះ គឺ​ហាក់​ធ្វើ​ឡើង​ដោយ​ប្រយោល ពី​នាយក​ប្រតិបត្តិ​ក្រុមហ៊ុន​ឯកទេស​ផលិត​ស្រោម​ទូរស័ព្ទ និង​ឧបករណ៍​អេឡិចត្រូនិក Slickwraps លោក Jonathan Endicott ដែល​លោក​បាន បង្ហោះ​រូប CAD អះអាង​ជា​ ស្រោម Galaxy Note 8 ​ដែល​មាន​ប្រឡោះ​ក្រោយ អាច​ឱ្យ​គេ​ដាក់​ម្រាមដៃ​ស្កេន​ជាមួយ​មុខងារ Fingerprint បាន។

​មិន​មែន​មាន​តែ Slickwraps ទើប​បង្ហើប​ស្រោម Note 8 ​ដែល​មាន​កន្លែង​សម្រាប់​ដាក់​ម្រាមដៃ​ស្កេន​នៅ​ផ្នែក​ក្រោយ​ប៉ុណ្ណោះ​ទេ កាលពី​សប្ដាហ៍​មុន ហាង​លក់​រាយ​គ្រឿង​បន្សំ Olixer ​ក៏​បាន​ចុះ​ផ្សាយ​ស្រោម Galaxy Note 8 ផង​ដែរ និង​ត្រូវ​បាន​គេហទំព័រ Forbes ​យក​ទៅ​ចុះផ្សាយ​ទៀត​ផង។ តាមរយៈ ស្រោម​ទូរស័ព្ទ Note 8 ទាំង​នេះ គឺ​អាច​ឱ្យ​គេ​សន្និដ្ឋាន​កាន់តែ​ច្បាស់​ថា ស្មាតហ្វូន​កូន​កាត់​ថេប្លេត​ថ្មី​នេះ ពិត​ជា​មាន Fingerprint ​នៅ​ខាង​ក្រោយ ហើយ​ក៏​ឃើញ​ភ្ជាប់​ជាមួយ​កាមេរ៉ា​ពីរ​គ្រាប់​រៀប​ទន្ទឹម​គ្នា​ផង​ដែរ។ https://youtu.be/zAp7nhUUOJE ខណៈ Apple និង Samsung ​ហាក់​កំពុង​ខិតខំ​សិក្សា ត្រៀម​ប្រើប្រាស់​អេក្រង់​ដែល​អាច​បង្កប់ fingerprint sensor ពី​ក្រោម​បាន​នោះ ចំណែក​ឯ​ក្រុមហ៊ុន Qualcomm ហាក់​បោះ​ជំហាន​ជើង​ទៅ​មុន​បន្តិច​ហើយ ដោយ​ទើប​បង្អួត​ចេញ​ប្រព័ន្ធ​ថ្មី​របស់​ខ្លួន នៅ​ក្នុង​ព្រឹត្តិការណ៍ MWC ទីក្រុង​សៀងហៃ​កាលពី​ខែ​មុន។ តាមរយៈ​ប្រព័ន្ធ​បច្ចេកវិទ្យា​ថ្មី​នោះ គឺ​អាច​ជួយ​ក្រុមហ៊ុន​ទូរស័ព្ទ​ចិន Vivo ​ធ្វើ​ការ​បង្កប់​បន្ទះ​ស្កេន​ក្រយៅដៃ​ពី​ក្រោម​កញ្ចក់​អេក្រង់​ទូរស័ព្ទ​ជំនាន់​ក្រោយ​ៗ​បាន៕   ​ប្រែ​សម្រួល៖ រឹទ្ធិរាជ ប្រភព៖  techspot