ថ្មីៗ​នេះ ក្រុមហ៊ុន Samsung ទើប​បាន​ផ្ញើ​លិខិត​អញ្ជើញ​ផ្ញៀវ​កិត្តិយស ចូលរួម​ព្រឹត្តិការណ៍​សម្ពោធ​ផលិតផល​ថ្មី​របស់​ខ្លួន គឺ​ផេប្លេត Galaxy Note 8។ នោះ​គឺ​ជា​ព្រឹត្តិការណ៍ Unpacked ដែល​នឹង​ប្រារព្ធ​ធ្វើ​នៅ​ទីក្រុង​ញីវយ៉ក​សហរដ្ឋ​អាមេរិក នៅ​ថ្ងៃ​ទី២៣ ខែ​សីហា​ក្រោយ​នេះ។

យើង​ឃើញ​រូប Poster នៃ​លិខិត​អញ្ជើញ​មាន​រំលេច​ពាក្យ Galaxy នៅ​ជ្រុង​ខាង​ស្ដាំ ផ្នែក​ខាង​លើ​បន្តិច ដែល​ហាក់​បញ្ជាក់​នូវ​វត្តមាន Galaxy Note 8 តែម្ដង ព្រោះ​ក៏​មាន​ភ្ជាប់​រូប​ប៊ិច S-Pen ​ផង​ដែរ។ ទម្រង់​រូប​ទូរស័ព្ទ ហាក់​ជា​ប្រភេទ​អេក្រង់ infinity display ​ដែល​ Samsung បាន​បំពាក់​លើ Galaxy S8/S8+ សព្វថ្ងៃ។ ក្នុង​នោះ​ក៏​មាន​បញ្ជាក់​ច្បាស់​អំពី​កាលបរិច្ឆេទ​នៃ​ព្រឹត្តិការណ៍ Unpacked ផង​ដែរ គឺ​នៅ​ថ្ងៃ​ទី២៣ ខែ​សីហា​ខាង​មុខ នៅ​ម៉ោង 11AM EDT ឬ​ម៉ោង 8AM Pacific។ Note 8 អាច​ត្រូវ​ភ្ជាប់​ឈីប Snapdragon 835 មាន​អេក្រង់​ទំហំ ៦,៣អ៊ីញ​ប្រភេទ infinity display គឺ​គ្រប់​ដណ្ដប់​ស្ទើរ​ពេញ​ផ្ទៃ​មុខ​របស់​ទូរស័ព្ទ ដូច​ទៅ​នឹង Galaxy S8 / S8+ ដែរ។ ស្មាតហ្វូន​កូន​កាត់​ថេប្លេត​ថ្មី​នេះ នឹង​បង្ហាញ​ខ្លួន​ជាមួយ RAM ទំហំ​ដល់ 6GB កម្លាំង​ថ្ម 3300mAh ដូច​ជា Note 7 Fan Edition ដែរ។ មុខងារ​ជំនួយការ​ឆ្លាតវៃ Bixby ដែល​មាន​លើ Galaxy S8 ក៏​នឹង​ត្រូវ​បញ្ចូល​លើ Note 8 ផង​ដែរ៕ ​ប្រែ​សម្រួល៖ រឹទ្ធិរាជ ប្រភព៖ techspot