ស្មាតហ្វូន​ទំនើប Essential របស់​អតីត​អ្នក​បង្កើត Android នឹង​មាន​​លក់​​ប៉ុន្មាន​សប្ដាហ៍​ខាង​មុខ​ តម្លៃ​ចាប់ពី $៦៩៩​



Essential Phone ជា​ផលិតផល​គួរ​ចាប់អារម្មណ៍​បំផុត​មួយ​ប្រចាំ​ឆ្នាំ ដែល​ត្រូវ​បាន​ប្រកាស​ចេញ​ដោយ​លោក Andy Rubin ​កាលពី​ខែ​ឧសភា​កន្លង​ទៅ មក​ដល់​ពេល​នេះ មិន​ទាន់​មាន​លក់​លើ​ទីផ្សារ​នោះ​នៅ​ឡើយ។ ទោះជា​យ៉ាងណា ស្មាតហ្វូន​ទំនើប​គែម​អេក្រង់​ខាង​មុខ​យ៉ាង​ស្ដើង​នេះ នឹង​ត្រូវ​ចែកចាយ​លក់​ក្នុង​ពេល​ឆាប់ៗ ប្រហែល​ប៉ុន្មាន​សប្ដាហ៍​ខាង​មុខ។ ​លោក Andy Rubin ​បាន​ធ្វើ​ការ​បញ្ជាក់​ជា​សាធារណៈ​ដើម្បី​អតិថិជន​បាន​ដឹង នូវ​ការ​ចរាចរ​ស្មាតហ្វូន Essential Phone គឺ​នៅ​ពេល​ឆាប់ៗ​នេះ​ហើយ ដែល​អតិថិជន​អាច​ចុះ​ឈ្មោះ ដើម្បី​ធ្វើ​ជា​ម្ចាស់​ទូរស័ព្ទ​នេះ​បាន​មុន​គេ នៅ​ប៉ុន្មាន​សប្ដាហ៍​ខាង​មុខ ប្រហែល​មិន​លើស​ពី ៣សប្ដាហ៍​នោះ​ទេ។ ខាង​ក្រោម​នេះ ជា​សេចក្ដី​បញ្ជាក់​របស់​លោក Rubin៖

សម្រាប់​តម្លៃ Essential Phone ​ម៉ូដែល unlocked ដូច​ជា​មិន​ថោក​ទេ គឺ​នឹង​មាន​តម្លៃ​ចាប់ពី ៦៩៩ដុល្លារ។ ទូរស័ព្ទ​គែម​ស្ដើង​របស់​អតីត​អ្នក​បង្កើត Android ​នេះ ប្រើ​ឈីប Qualcomm Snapdragon 835, RAM 4GB, USB Type-C, កម្លាំង​ថ្ម 3040mAh និង​មេម៉ូរី​ទំហំ 128GB ប្រភេទ UFS 2.0។ មិន​ដូច​ទៅ​នឹង​ស្មាតហ្វូន​ទំនើបៗ​បច្ចុប្បន្ន​ដែល​ផលិត​ពី​សារធាតុ​អាលុយមីញ៉ូម​នោះ​ទេ ដោយ Essential ​គឺ​បាន​ផលិត​ពី​សារធាតុ​ទីតាញ៉ូម និង​សេរ៉ាមិក មាន​ន័យ​ជា វា​រឹតតែ​មាន​ភាព​ធន់​ខ្លាំង​ជាង​មុន ទៅ​លើ​ការ​ប្រើប្រាស់ ក៏​ដូច​ជា​ធន់​នឹង​ការ​ធ្លាក់​ជាង​មុន។ វា​ថែមទាំង​មាន​រូបរាង​ស្រលូន និង​រលោង ហើយ​ពុំ​មាន​បិទ​រូប​ឡូហ្គោ​នោះ​ទេ។ ស្មាតហ្វូន ​Essential ​នឹង​មាន​ទំហំ​អេក្រង់ ៥,៧អ៊ីញ កម្រិត 2560×1312 QHD (503ppi) ហើយ​មាន​លក្ខណៈ​ដូច​ជា​ស្មាតហ្វូន​ទូទៅ​ដែរ ដោយ​មាន​កម្រិត​បង្ហាញ​រូប 19:10 display ​និង​មាន​គែម​អេក្រង់​ស្ដើង edge-to-edge។ យើង​សង្កេត​ឃើញ​គែម​អេក្រង់​របស់ Essential ​ហាក់​ស្ដើង​ជាង Galaxy S8 បន្តិច នៅ​ផ្នែក​ខាង​លើ ហើយ​មាន​កាមេរ៉ា​មុខ​ទំហំ​តូច​មួយ​នៅ​ចំ​កណ្ដាល​ផ្នែក​ខាង​លើ​នោះ។

អ្វី​ដែល​គួរ​ចាប់អារម្មណ៍​ផ្សេង​ទៀត​នៅ​លើ​ស្មាតហ្វូន Essential ​គឺ​វា ត្រូវ​បាន​ឌីហ្សាញ​ឱ្យ​មាន​លក្ខណៈ​ជា​ម៉ូឌុល​ដែល​​អាច ឱ្យ​ឧបករណ៍​បន្សំ​ខាង​ក្រៅ មក​ភ្ជាប់​ប្រើ​ជាមួយ​វា​បាន ជាក់ស្ដែង​គឺ​កាមេរ៉ា ៣៦០ដឺក្រេ ដែល​មាន​សមត្ថភាព​អាច​ថត​វីដេអូ​កម្រិត UHD ​នៅ 30fps បាន ហើយ​ក៏​មាន​ដុំ charging dock ​អាច​ប្រើ​ជាមួយ Essential ផង​ដែរ។ លេន​កាមេរ៉ា​នៅ​លើ Essential ​ត្រូវ​បាន​ឌីហ្សាញ​ឱ្យ​មាន​លក្ខណៈ​រាប​ស្មើ​ទៅ​នឹង​តួ​ទូរស័ព្ទ និង​មាន​កាមេរ៉ា​ភ្លោះ dual camera នៅ​ខាង​ក្រោយ ទំហំ 13MP CIS ​និង monochrome CIS ដែល​ជួយ​បន្ថែម​ពន្លឺ​ក្នុង​ការ​ថត​រូប​នៅ​ទីងងឹត​បាន​ច្បាស់។ ចំណែក​កាមេរ៉ា​មុខ​របស់​វា​មាន​ទំហំ 8MP ដែល​អាច​ថត​វីដេអូ​កម្រិត 4K ទាំង​កាមេរ៉ា​មុខ និង​ក្រោយ។ លក្ខណៈ​សម្បត្តិ​ផ្សេង​ទៀត​នោះ គឺ​ថា អេក្រង់ Essential បាន​ក្រាល​ដោយ​កញ្ចក់​ការពារ Gorilla Glass 5 ​ដំណើរការ​ដោយ​ប្រព័ន្ធ​ប្រតិបត្តិការ Android Nougate 7.1.1 ​មាន​ទ្រនាប់​ស្កេន​ក្រយៅដៃ​នៅ​ខាង​ក្រោយ​រាង​មូល ដូច​ជា Google Pixel ដែរ និង​មាន Bluetooth 5.0។ ដូច​ទៅ​នឹង iPhone 7 និង 7 Plus ដែរ ដោយ Essential ពុំ​មាន​រន្ធ​កាស headphone jack ​នោះ​ទេ ប៉ុន្តែ​មាន​នូវ​ដុំ​បន្ត USB C-to-3.5mm adapter សម្រាប់​ប្រើ​ជាមួយ​ស្ទើរ​គ្រប់​កាស​ត្រចៀក​បាន៕ ​ប្រែ​សម្រួល៖ រឹទ្ធិរាជ ប្រភព៖  phonearena
X
5s