ថ្មីៗ​នេះ ក្រុមហ៊ុន BMW ​ទើប​ប្រកាស​ចេញ​រថយន្ត​ស៊េរី​ថ្មី ស្ថិត​ក្នុង​សែស្រឡាយ 7 Series តែ​ជា​ជំនាន់​ថ្មី ត្រូវ​បាន​សម្រិតសម្រាំង និង​ផលិត​ក្នុង​ចំនួន​កំណត់។ រថយន្ត​ស៊េរី​ថ្មី​នេះ ត្រូវ​ក្រុមហ៊ុន​ហៅ​ឈ្មោះ​ថា BMW 7 Series Edition 40 Jahre ដែល​នឹង​ត្រូវ​ផលិត​លក់​ត្រឹម ២០០គ្រឿង​ប៉ុណ្ណោះ។

​BMW 7 Series Edition 40 Jahre ជា​រថយន្ត​ត្រូវ​បាន​ផលិត ដើម្បី​អបអរ​ខួប ៤០ឆ្នាំ​នៃ​ស៊េរី​រថយន្ត 7 Series របស់​ក្រុមហ៊ុន​អាល្លឺម៉ង់​នេះ។ រថយន្ត​នឹង​ត្រូវ​ផលិត​ដោយ​បំពាក់​មុខងារ​មួយ​ចំនួន ​ពិសេស​ខុស​ពី​ម៉ូដែល​ធម្មតា។ អស់​រយៈពេល ៤ ទសវត្ស​មក​ហើយ ម៉ូដែល “7” គឺ​ជា​និមិត្តរូប​នៃ​រថយន្ត​ម៉ាក BMW ដែល​ត្រូវ​បាន​គេ​ស្គាល់​ថា ជា​រថយន្ត​ប្រណិត បច្ចេកវិទ្យា​ទំនើប និង​ជា​រថយន្ត​មាន​ការ​ច្នៃប្រឌិត​ខ្ពស់។

​ជាមួយ​ម៉ូដែល​រថយន្ត​ស៊េរី​ខ្ពស់​បំផុត របស់ BMW ​គឺ​ត្រូវ​បាន​ក្រុមហ៊ុន​បង្អួត​នូវ​សមិទ្ធផល​ដែល​ជា​បច្ចេកវិទ្យា​មាន​ភាព​ឆ្លាតវៃ សម្រាប់​បម្រើ​តម្រូវការ​អ្នក​ប្រើប្រាស់​បាន​កាន់តែ​ល្អ​ប្រសើរ ផ្ដល់​ទំនុក​ចិត្ត ផាសុកភាព សមត្ថភាព និង​គុណភាព​ខ្ពស់​។ ការ​ច្របាច់​បញ្ចូល​គ្នា​រវាង​រថយន្ត​ធម្មតា ជាមួយ​រថយន្ត​សម្រិតសម្រាំង​មាន​ការ​ច្នៃប្រឌិត​ប្លែក​ខុស​គ្នា គឺ​នៅ​តែ​ជា​អត្តសញ្ញាណ​ដែល BMW ចង់​បង្ហាញ អំពី​សមិទ្ធផល​រថយន្ត​ប្រណិត និង​ជា​ស៊េរី​រថយន្ត​ស៊ីដាន (sedan) ​ជំនាន់​ទី៦ បំពាក់​លើ​រថយន្ត​ដែល​ត្រូវ​បាន​ឱ្យ​ឈ្មោះ​ថ្មី​ថា BMW 7 Series Edition 40 Jahre។ BMW 7 Series Edition 40 Jahre នឹង​បង្ហាញ​ខ្លួន​ក្នុង​ពិព័រណ៍ Frankfurt International Motor Show (IAA) ឆ្នាំ២០១៧ ក្នុង​ពេល​ខាង​មុខ៕ ប្រែ​សម្រួល៖ រឹទ្ធិរាជ ប្រភព៖ BMW