ទើប​ថ្មីៗ​នេះ យើង​បាន​ឃើញ​រូបថត​ទូរស័ព្ទ​ប៉ុន្មាន​សន្លឹក​ដែល​គេ​សន្និដ្ឋាន​ថា ជា​ស្មាតហ្វូន​ទំនើប Nokia 8 ហើយ​ពេល​នេះ យើង​ក៏​ទទួល​បាន​ព័ត៌មាន​បន្ថែម​អំពី​តម្លៃ​របស់​វា​វិញ​ម្ដង។ យោងតាម​សេចក្ដី​រាយការណ៍​ថ្មីៗ​នេះ ឱ្យ​ដឹង​ថា ស្មាតហ្វូន​ថ្មី​របស់​ក្រុមហ៊ុន​ហ្វាំងឡង់ Nokia 8 ​នេះ នឹង​មាន​តម្លៃ​ប្រហែល ៥២០អឺរ៉ូ (ប្រហែល ៦១០ដុល្លារ) នៅ​ពេល​ដាក់​លក់​លើ​ទីផ្សារ។

Nokia 8 ត្រូវ​គេ​រំពឹង​ថា នឹង​ត្រូវ​វែកមុខ​នៅ​ថ្ងៃ​ទី១៦ ខែ​សីហា​ខាង​មុខ អម​ជាមួយ​លក្ខណៈ​សម្បត្តិ​ខ្ពស់ បច្ចេកវិទ្យា​ថ្មីៗ ដើម្បី​ប្រកួតប្រជែង​ស្មាតហ្វូន​ទំនើបៗ​បច្ចុប្បន្ន។ ឯកសារ​ធ្លាយ​ចេញ​ពី​ក្រុមហ៊ុន Vodafone Romania ​បង្ហាញ​ថា Nokia 8 នឹង​មាន​តម្លៃ​ប្រហែល ៥២០អឺរ៉ូ ​ដែល​រួម​បញ្ចូល​ពន្ធ​រួច។ យ៉ាងណា តម្លៃ​នេះ​មិន​ទាន់​ត្រូវ​អះអាង​ពី​ក្រុមហ៊ុន​ផ្ទាល់​នៅ​ឡើយ។

 រូបបែកធ្លាយដែលគេអះអាងជា Nokia 8 កាមេរ៉ាភ្លោះ

 

បើ​តាម​ចចាមអារ៉ាម​កន្លង​ទៅ​អះអាង​ថា Nokia 8 ​នឹង​ប្រើ​ឈីប Snapdragon 835 ​ហើយ​មាន​ជម្រើស RAM ​ពីរ​ផ្សេង​គ្នា​គឺ 4GB ឬ 6GB។ ទូរស័ព្ទ​នេះ នឹង​មាន​អេក្រង់ ៥,៣អ៊ីញ​កម្រិត QHD ​(2560x1440)px។ លក្ខណៈ​សម្បត្តិ​ផ្សេង​ទៀត​នៅ​លើ Nokia 8 ​អាច​មាន​កាមេរ៉ា​ក្រោយ dual camera ​បច្ចេកវិទ្យា Carl Zeiss Optics។ កាមេរ៉ា​ភ្លោះ​នោះ អាច​មាន​ទំហំ 13MP ​ដូច​គ្នា។ Nokia 8 ​នឹង​ត្រូវ​សម្ពោធ​ចេញ​ក្នុង​ខែ​សីហា អាច​នៅ​ថ្ងៃ​ទី១៦៕ ប្រែ​សម្រួល៖ រឹទ្ធិរាជ ប្រភព៖ Mobilissimo, GSM Arena