តាមការសម្រេចចិត្តរបស់សហព័ន្ធគណៈកម្មការទំនាក់ទំនង FCC បានផ្ដល់ការអនុញ្ញាតឱ្យ Apple មានសិទ្ធិចាប់ផ្ដើមធ្វើតេស្តលើបច្ចេកវិទ្យា 5G នៅលើទឹកដីរបស់ខ្លួនដែលជាក្រុង Cupertino និង Milpitas នៃរដ្ឋកាលីហ្វ័រញ៉ា។
នេះបង្ហាញឱ្យឃើញពីការបោះជំហានទៅមុខរបស់ Apple ក្នុងការព្យាយាមអភិវឌ្ឍខ្លួនលើ វិស័យទូរគមនាគមន៍ ដោយសម្លឹងចង់បង្កើន រលកប្រេកង់ សម្រាប់ការស្រាវជ្រាវ និងអភិវឌ្ឍខ្លួនទៅមុខ ក៏ដើម្បីច្របាច់បញ្ចូលបច្ចេកវិទ្យា 5G ទៅលើ iPhone អនាគត។ ឯកសារ FCC បានបង្ហាញ ឱ្យឃើញលំដាប់ប្រេកង់ដែលនឹងត្រូវធ្វើតេស្តក្នុងចន្លោះ 27.5-28 Ghz និង 38.6-40Ghz ត្រូវផ្ដល់សិទ្ធិឱ្ហធ្វើតេស្ត។
ទោះបីដែន 28Ghz spectrum ត្រូវបានត្រៀមរៀបចំសម្រាប់ផែនដី ទៅកាន់ផ្កាយរណបទំនាក់ទំនង ដូច្នេះ វាប្រហែលមិនមែនសម្រាប់យកទៅប្រើប្រាស់នៅលើទូរស័ព្ទ iPhone នោះទេ តែអ្វីដែលអាចត្រូវបានប្រើ គឺនៅលើផែនទី Apple Maps ក្នុងការកែលំអសេវាកម្មនេះទៅវិញទេ។ បើប្រៀបធៀបនឹង រលកប្រេកង់ 600Mhz spectrum របស់ក្រុមហ៊ុន T-Mobile និង 2.5Ghz របស់ Sprint វិញ គឺអាចត្រូវបានប្រើសម្រាប់បច្ចេកវិទ្យាឥតខ្សែជំនាន់ក្រោយបាន។
ហេតុអ្វី Apple ជ្រើសរើសធ្វើការលើ ប្រព័ន្ធបណ្ដាញ 5G ជំនួសកិច្ចការដែលគួរធ្វើដោយក្រុមហ៊ុនទូរគមនាគមន៍ទៅវិញ។ យ៉ាងណា ពេលនេះ គេមិនច្បាស់នៅឡើយ ថាមានមូលហេតុពីក្រោយអ្វីខ្លះ តែ Google និង Facebook ក៏មានគម្រោង 5G រៀងៗខ្លួនមកហើយ សម្រាប់បន្ថែមជម្រើសការប្រើប្រព័ន្ធនេះលើទីផ្សារអាមេរិក ដូច្នេះ Apple ប្រហែលសម្លឹងឃើញ ដើម្បីចង់ធ្វើឱ្យខ្លួនមានភាពជាឯករាជ្យក៏ថាបាន៕
ប្រែសម្រួល៖ រឹទ្ធិរាជ
ប្រភព៖ techspot
