លោក សោម សម្បត្តិ នាយកប្រតិបត្តិ Cam-Paint ៖ «បើចង់ធ្វើអាជីវកម្មជោគជ័យកុំនៅខាង ៩៧% តែនៅខាង ៣%!»
លោក សោម សម្បត្តិនាយកប្រតិបត្តិ និងជាស្ថាបនិកសហគ្រាសផលិតថ្នាំពណ៌ជាតិ Cam-Paint បានលើកឡើងថា ៖ «បើចង់ធ្វើអាជីវកម្មទទួលបានជោគជ័យ កុំធ្វើតាមមនុស្ស ៩៧% តែធ្វើតាមមនុស្ស ៣%»។ លោកបានថ្លែងបែបនេះ នៅក្នុងកម្មវិធីចែករំលែកបទពិសោធន៍មួយលើប្រធានបទ «តើត្រូវត្រៀមអ្វីខ្លះបើចង់បើកអាជីវកម្ម?» ដែលរៀបចំឡើងដោយ ផាកកាហ្វេ នៅសាខាត្រសក់ផ្អែម។
សហគ្រិនដែលមានបទពិសោធន៍ហែលឆ្លងឧបសគ្គយ៉ាងច្រើនទម្រាំទទួលបានជោគជ័យរហូតដល់សព្វថ្ងៃនេះ បានថ្លែងពន្យល់ថា មានមនុស្សប្រហែល ៩៧%ដែលចូលចិត្តគិតអ្វីដែលស្រួលៗ ហើយចង់បានលទ្ធផល ឬជោគជ័យដូចគេដូចឯង ប៉ុន្តែមានមនុស្សប្រហែល ៣%ប៉ុណ្ណោះដែលចូលចិត្តគិតអ្វីដែល ពិបាក សាំញ៉ាំ ស្មុគស្មាញ និងខុសពីគេ។ បុគ្គលដែលនៅខាង ៣%នេះហើយ ដែលភាគច្រើនទទួលបានជោគជ័យ ព្រោះវិធីដែលធ្វើគឺសាំញ៉ាំ ហើយតែងតែមានគំនិតច្នៃប្រឌិតឱ្យខុសពីគេជានិច្ច។ នេះហើយ ជាចំណុចស្នូលធ្វើឱ្យពួកគេជោគជ័យ៕
