វាហាក់ដូចជាយើងបានរូបថតផ្លូវការលើកដំបូងនៃទូរស័ព្ទទំនើប Galaxy Note 8។ រូបភាពនេះ ត្រូវបានបង្ហោះនៅលើបណ្ដាញសង្គម Twitter ដោយគណនីឈ្មោះ Evan Blass។ ក្រុមហ៊ុន Samsung នឹងសម្ពោធចេញ Galaxy Note 8 ផ្លូវការនៅចុងខែសីហានេះហើយ។ ក្រុមហ៊ុនត្រៀមរៀបចំសន្និសីទកាសែតសម្រាប់ការបង្ហាញវត្តមានផលិតផលថ្មីខ្លួននៅថ្ងៃ ២៣ ខាងមុខ។
Galaxy Note 8 ត្រូវគេរំពឹងថា នឹងមានលក់លើទីផ្សារចាប់ពីចុងខែសីហា ឬដើមខែកញ្ញាខាងមុខ។ ស្មាតហ្វូនកាន់ថេប្លេតនេះ នឹងបង្ហាញខ្លួនជាមួយទំហំអេក្រង់ ៦,៣អ៊ីញកម្រិត QHD ឬដល់ QHD+ ហើយនឹងមានបំពាក់អង្គប្រតិបត្តិ Processor ផ្សេងគ្នា ពីរជម្រើស ចេញលក់ទៅតាមទីផ្សារកំណត់។ ទីផ្សារខ្លះ នឹងមានលក់នូវជម្រើស Qualcomm Snapdragons 835 ខណៈទីផ្សារផ្សេងទៀតអាចប្រើឈីប Samsung Exynos ហើយនឹងមាន RAM ដល់ 6GB ដូចគ្នា។
Note 8 នឹងចែកទំហំអង្គចងចាំដល់ទៅ ៣ជម្រើសគឺ 64GB, 128GB និងម៉ូដែល Emperor Edition មានរហូតដល់ 256GB ។ Note 8 ថែមទាំងនឹងបំពាក់កាមេរ៉ាសមត្ថភាពខ្ពស់ជាងគេផងដែរ ដោយខាងក្រោយជាកាមេរ៉ាភ្លោះ មួយមានទំហំ 13MP ប្រភេទ wide angle lens និងមួយទៀតទំហំ 12MP sensor មុខងារជា telephoto lens ជាមួយ 3x optical zoom។
Galaxy Note 8 នឹងដំណើរការប្រព័ន្ធសូហ្វ៊ែរ Android 7.1.1 Nougat នៅពេលបង្ហាញខ្លួន។ ផេប្លេតថ្មីនេះ ក៏នឹងអាចទទួលបានកញ្ចប់សូហ្វ៊ែរបច្ចុប្បន្នភាពថ្មី Android O នៅឆាប់ៗខាងមុខផងដែរ៕
ប្រែសម្រួល៖ រឹទ្ធិរាជ
ប្រភព៖ Evan Blass
