​iPhone ​ជំនាន់​ដំបូង​ត្រូវ​បាន​ប្រកាស​ចេញ​ក្នុង​ឆ្នាំ២០០៧ ​ហើយ​ឆ្នាំ​នេះ​ដែរ iPhone 8 ​នឹង​ជា​ទូរស័ព្ទ​ដ៏​ជោគជ័យ​ថ្មី​មួយ​ទៀត សម្រាប់​ចេញ​សាទរ​នឹង​ខួប​គម្រប់ ១០ឆ្នាំ​នៃ​ម៉ាក iPhone ​តែម្ដង។ ក្រុមហ៊ុន Apple បាន​ប្រកាស​នូវ​លទ្ធផល​ហិរញ្ញវត្ថុ​របស់​ខ្លួន​ប្រចាំ​ត្រីមាស​ទី៣ ឆ្នាំ២០១៧ នេះ កាលពី​ម្សិលមិញ ហើយ​ថែមទាំង​បាន បង្ហាញ​ចេញ​តួលេខ​សរុប​នៃ​ការ​ចែកចាយ​លក់ iPhone គ្រប់​ជំនាន់​របស់​ខ្លួន រាប់​ចាប់តាំង​ពី iPhone ជំនាន់​ទី១ គឺ​មាន ១,២ពាន់​លាន​គ្រឿង។

iPhone ជំនាន់​ទី (២០០៧)

គិត​មក​ដល់​ពេល​នេះ ក្រុមហ៊ុន Apple បាន​លក់​ដាច់ iPhone ​សរុប​ប្រមាណ ១,២ពាន់​លាន​គ្រឿង នៅ​រយៈពេល ១០ឆ្នាំ​មក​នេះ។ បើ​គិត​តែ​រយៈពេល ១២ខែ​ចុងក្រោយ ឃើញ​ថា Apple អាច​លក់​ស្មាតហ្វូន​របស់​ខ្លួន​ដាច់​បាន ២០០លាន​គ្រឿង។ នេះ​ជា​អ្វី​ដែល​នាយក​ប្រតិបត្តិ Apple លោក Tim Cook មាន​ប្រសាសន៍​អំពី​ទូរស័ព្ទ iPhone៖

“លទ្ធផល​ចែកចាយ​លក់ iPhone នេះ​គឺ​ពិត​ជា​ធ្វើ​ឱ្យ​មាន​ការ​រំភើប​យ៉ាង​ខ្លាំង ដោយ​បញ្ជាក់​នូវ​តម្រូវការ​ដ៏​ខ្លាំងក្លា​ពី​សំណាក​អ្នក​ប្រើប្រាស់ រាប់​ទាំង iPhone ទំនើប​ចុងក្រោយ។ iPhone 7 ​គឺ​ជា ​ទូរស័ព្ទ​ដែល​ទទួល​បាន​ប្រជាប្រិយ​ខ្លាំង​បំផុត ខណៈ iPhone 7 Plus ​ក៏​ទទួល​បាន​ការ​និយម​ប្រើ​ខ្លាំង​ជាង 6s Plus ​ផង​ដែរ នៅ​ត្រីមាស​ខែ​មិថុនា កាលពី​ឆ្នាំ​មុន។ រាប់​បញ្ចូល​គ្នា​ទាំង iPhone 7 និង iPhone 7 Plus គឺ​លក់​ដាច់​ជាង​រាល់​ឆ្នាំ ស្មើ​គុណ​នឹង​២”។

រយៈពេល ១ទសវស្សន៍​បន្ទាប់​ពី iPhone ដំបូង​ចាប់​កំណើត រហូត​មក​ដល់​ពេល​នេះ ក្រុមហ៊ុន Apple បាន​ចែកចាយ​ទូរស័ព្ទ​របស់​ខ្លួន ដាច់​បាន​រហូត​ដល់ ១,២ពាន់​លាន​គ្រឿង។ Apple នឹង​បន្ត​ចេញ iPhone ស៊េរី​ថ្មី​ដែល​ជា iPhone 8 នៅ​អំឡុង​ខែ​កញ្ញា​ក្រោយ​នេះ ហើយ​យើង​ក៏​ប្រហែល​អាច​ឃើញ iPhone 7S និង 7S Plus ចេញ​ថ្មី​ដំណាលគ្នា​ផង​ដែរ៕ ប្រែ​សម្រួល៖ រឹទ្ធិរាជ ប្រភព៖ 9 to 5 Mac