យើងបានឮដំណឹងមកថា V30 របស់ LG នឹងត្រូវសម្ពោធចេញក្នុងថ្ងៃទី៣១ ខែសីហា ក្នុងព្រឹត្តិការណ៍ IFA នៃទីក្រុងប៊ែរឡាំងប្រទេសអាល្លឺម៉ង់។ ឥឡូវនេះ ក្រុមហ៊ុនបច្ចេកវិទ្យាកូរ៉េនេះ ទើបប្រាប់ព័ត៌មានលំអិតបន្ថែម ជុំវិញកំពូលស្មាតហ្វូន V30 របស់ខ្លួន ដោយនឹងប្រើប្រាស់អេក្រង់កោង OLED ដែលគាំទ្រការប្រើជាមួយមុខងារ VR។
V30 នឹងជាស្មាតហ្វូនទំនើបដំបូងរបស់ LG ចាប់តាំងពី ស្មាតហ្វូនត្រកូល G Flex ជំនាន់២ ដែលចេញកាលពីឆ្នាំ២០១៥ ភ្ជាប់អេក្រង់ OLED។ ក្រុមហ៊ុនកូរ៉េនេះ ទើបបានអះអាងថា នឹងប្ដូរពីការប្រើអេក្រង់ LCD មកជាអេក្រង់ OLED សម្រាប់បំពាក់នៅលើ V30 ហើយក៏នឹងបង្កើនកម្លាំងថ្ម បង្កើនពណ៌ធម្មជាតិល្អជាងមុន និងដំណើរការកាន់តែរលូន។ នេះគឺដោយសារបន្ទះអេក្រង់ប្លាស្ទិក OLED (P-OLED) ដែល LG បានអះអាងថា នឹងមិនចេះកើតបញ្ហា ស្លោក ឆេះ ដូចអេក្រង់ OLED មួយចំនួនឡើយ ហើយវាក៏នឹងជាអេក្រង់កោងឃុបសងខាង ដែលមានលក្ខណៈទំនើបមិនចាញ់ Galaxy S8/ S8+ នោះដែរ។
ស្មាតហ្វូន V30 ថ្មីរបស់ LG អាចមានអេក្រង់ ៦អ៊ីញ ធំជាង LG G6 ប៉ុន្តែមានកម្រិត FullVision 18:9 aspect ratio និង 2880x1440px ដូចគ្នា តែលើសត្រង់ថា អេក្រង់រថ្មីនេះ ត្រូវបានភ្ជាប់លើ V30 ដើម្បីគាំទ្រមុខងារ VR បន្ថែម។ ក៏មានការគាំទ្រមុខងារ HDR 10 និងប្រព័ន្ធ Google Daydream ហើយមាន ១៤៨% នៃ DCI-P3 color space។ V30 នឹងមានមុខងារមិនជ្រាបទឹក មិនចូលធូលី IP68 water/dust resistance និង B&O audio ហើយកាមេរ៉ារបស់ស្មាតហ្វូននេះ មានកម្រិត f/1.6 aperture៕
ប្រែសម្រួល៖ រឹទ្ធិរាជ
ប្រភព៖ techspot
