ជាមួយ​រយៈពេល​ប្រហែល ១ខែ​ទៀត​ប៉ុណ្ណោះ iPhone ​ជំនាន់​ថ្មី​របស់ Apple នឹង​ត្រូវ​ទម្លាយ​ចេញ​ផ្លូវការ តែ​ខណៈ​ពេល​នេះ ព័ត៌មាន​ជុំវិញ​កំពូល​ស្មាតហ្វូន​ទំនើប​នេះ នៅ​បន្ត​ចេញ​ឥត​ឈប់ ជាក់ស្ដែង​ទើប​លេច​ថត ដែល​គេ​អះអាង​ជា ខ្នង​ទូរស័ព្ទ iPhone 7s Plus ដែល​ឌីហ្សាញ​ថ្មី ក្រាល​ដោយ​កញ្ចក់​ថ្លា។

ក្នុង​រូប​បែក​ធ្លាយ​ខាង​លើ បង្ហាញ​ឱ្យ​ឃើញ ទូរស័ព្ទ​ដែល​គេ​អះអាង​ជា iPhone 7s Plus នេះ មាន​តួ​ផលិត​ពី​អាលុយមីញ៉ូម ហើយ​ថែមទាំង​ក្រាល​ដោយ​កញ្ចក់​មួយ​ជាន់​ទៀត ទៅ​លើ​ផ្នែក​ខាង​ក្រោយ​ទូរស័ព្ទ។ តែ​បើ​មើល​តាម​រចនាបថ​ឌីហ្សាញ​វិញ វា​ហាក់​មិន​មានការ​កែប្រែ​អ្វី​ខ្លាំង​គួរ​ឱ្យ​កត់សម្គាល់​នោះ​ទេ។

ក្រៅពី​មាន​ខ្នង​ទូរស័ព្ទ​ក្រាល​ដោយ​កញ្ចក់​ហើយ​នោះ បើ​តាម​របាយការណ៍​មុន ធ្លាប់​លើកឡើង​ទៀត​ថា iPhone 7s និង iPhone 7s Plus នឹង​មាន​បច្ចេកវិទ្យា​សាកថ្ម​ឥត​ខ្សែ wireless charging ​ដែល​នឹង​ប្រើ​ទ្រនាប់​សាកថ្ម charger pad ជំនួស​ឱ្យ​ខ្សែ Lightning។ កញ្ចក់​ដែល​ក្រាល​នៅ​ផ្នែក​ខាង​ក្រោយ​ទូរស័ព្ទ​នោះ អាច​ជា​គំនិត​មួយ សម្រាប់​គាំទ្រ​ដល់​មុខងារ សាកថ្ម​ឥត​ខ្សែ​ថ្មី​ក៏​ថា​បាន។ យ៉ាងណា សមាសធាតុ​កញ្ចក់ វា​មិន​ឆាប់​ភាយ​កម្ដៅ​ចេញ ជាង​ការ​ប្រើ​អាលុយមីញ៉ូម​នោះ​ទេ។ ក្រុមហ៊ុន Apple ត្រូវ​គេ​រំពឹង​ថា នឹង​បន្ថែម​សមាសធាតុ​ថ្មី​មួយ ក្នុង​ស្រទាប់​ក្រាភីត (graphite layer) ​ដើម្បី​ការពារ 3D Touch Sensor។ លក្ខណៈ​គួរ​កត់​សម្គាល់​មួយ​ទៀត គឺ​ថា ខ្សែ​អង់តែន antenna bands ​ដែល​ធ្លាប់តែ​មាន​នៅ​លើ iPhone 6, 6s, 7 នោះ​នឹង​ត្រូវ​ដក់​ចេញ​ពី iPhone 7s។ Apple ត្រូវ​រំពឹង​ថា នឹង​ប្រកាស iPhone 7s, iPhone 7s Plus និង iPhone 8 នៅ​អំឡុង​ខែ​កញ្ញា ហើយ​នឹង​មាន​លក់​ចាប់ពី​ខែ​តុលា ២០១៧ ខាង​មុខ៕ ​ប្រែ​សម្រួល៖ រឹទ្ធិរាជ ប្រភព៖  phonearena