​មុខងារ​ពិសេស​មួយ​ក្នុង​ចំណោម​មុខងារ​ផ្សេង​ទៀត ដែល YouTube ​បាន​ដាក់​ឱ្យ​ប្រើ​នៅ​លើ Desktop នោះ គឺ Speed Controls ​ដែល​វា​អាច ធ្វើ​ឱ្យ​ល្បឿន Play វីដេអូ YouTube ​លឿន ឬ​យឺត​ជាង​ធម្មតា។ មុខងារ​នេះ គឺ​អាច​មាន​ប្រយោជន៍​ ដល់​អ្នក​ដែល​ចង់​ស្វែងយល់​ពី​វីដេអូ YouTube ​ប្រសិន​ទស្សនា​មិន​ទាន់​ព្រោះ​តែ​សកម្មភាព​ក្នុង​វីដេអូ​រហ័ស​ពេក ឬ​ដើម្បី​សន្សំ​ពេល ចំពោះ​វីដេអូ​ដែល​មិន​ចាំបាច់​មើល​យឺត ពោល​គ្រាន់តែ​បន្ថែម​ល្បឿន Speed ​ឱ្យ​លឿន​ក៏​បាន។

ឥឡូវ​នេះ YouTube បាន​បន្ថែម​មុខងារ​គ្រប់គ្រង​ល្បឿន​វីដេអូ Speed Control នេះ​នៅ​លើ​កម្មវិធី YouTube សម្រាប់​ស្មាតហ្វូន​វិញ​ម្ដង។ គេហទំព័រ 9to5Google បាន​គូស​បញ្ជាក់​ថា ជម្រើស​កំណត់​ល្បឿន​វីដេអូ​នេនះ នឹង​អាច​ប្រើ​បាន​នៅ​លើ​ YouTube ​សម្រាប់ Android ​ជំនាន់ 12.29.57 ប៉ុន្តែ​ជម្រើស នឹង​មិន​អាច​ប្រើ​គ្រប់​គ្នា​នៅ​ឡើយ។ ជម្រើស​ល្បឿន​វីដេអូ​នៅ​លើ Mobile ​ហាក់​មិន​ខុស​គ្នា​នឹង​ជំនាន់ Desktop នោះ​ទេ រួម​មាន៖ 0.75x, 0.5x ឬ 0.25x ដែល​ជា​ល្បឿន​ធម្មតា ឬ​ល្បឿន​លឿន​ជាង​នេះ​នៅ 1.25x, 1.5x, ឬ 2x។ យ៉ាងណា ពេល​នេះ ពុំ​ទាន់​មាន​ការ​អះអាង​ផ្លូវការ​ពី​ក្រុមហ៊ុន Google ​អំពី​មុខងារ​នេះ ថា​ពេល​ណា​ទើប​មាន​ឱ្យ​ប្រើ​គ្រប់​ឧបករណ៍ Android នៅ​ឡើយ។ យ៉ាងណា ប្រិយមិត្ត​អាច​សាកល្បង ឆែក​មើល​នៅ​លើ​កម្មវិធី YouTube ក្នុង​ស្មាតហ្វូន Android របស់​ខ្លួន​បាន ថា​តើ​មាន​ហើយ​ឬ​នៅ? ប្រែ​សម្រួល៖ រឹទ្ធិរាជ ប្រភព​៖  phonearena