ពណ៌មាសថ្មី ដែលទើបមានសេចក្ដីរាយការណ៍ថ្មីនេះថា Copper Gold នោះ ប្រហែលត្រូវហៅឈ្មោះផ្សេងហើយ។ បើតាមរបាយការណ៍ថ្ងៃនេះ អះអាងថា ពណ៌មាសថ្មីនៅលើ iPhone 8 នឹងត្រូវហៅ “Blush Gold” ជំនួស Copper Gold។ នេះបើតាមការបង្ហោះនៅលើវែបសាយបណ្ដាញសង្គមចិន Weibo។ ប្រភពដដែលឱ្យដឹងទៀតថា ពណ៌មាស Blush Gold នឹងមាននៅលើ iPhone ស៊េរីថ្មីជាមួយជម្រើសអង្គចងចាំពីរទំហំប៉ុណ្ណោះគឺ 64GB និង 128GB។
ផ្អែកតាមការបង្ហោះ tweet ដោយគណនី Twitter មួយឈ្មោះ Benjamin Geskin បានបង្ហាញនូវរូប render ស្ដីពណ៌មាស Copper លើ iPhone 8។ Geskin បានសរសេរបញ្ជាក់ថាឈ្មោះពណ៌ Blush Gold ត្រូវបានហៅនៅក្នុងរោងចក្រ Foxconn ក្នុងការកំណត់សម្គាល់ទូរស័ព្ទពណ៌ថ្មីនេះ។ បើយោងតាមសេចក្ដីរាយការណ៍ពីអ្នកវិភាគ Ming-Chi Kuo មកពីក្រុមហ៊ុន KGI Securities វិញ បានលើកឡើងថា iPhone 8 នឹងមានជម្រើសពណ៌ថ្មីគឺ មាស Copper Gold អមជាមួយពណ៌ ស និងខ្មៅ។ លោក Kuo ថែមទាំងរំពឹងថា មានតែ ២លានគ្រឿង ទៅ ៤លានគ្រឿងប៉ុណ្ណោះ ដែល iPhone 8 ត្រូវផលិតក្នុងដំណាក់កាលដំបូងនៃការចែកចាយលក់។
យោងតាមសេចក្ដីរាយការណ៍ខ្លះ ឱ្យដឹងថា ជម្រើសពណ៌ Blush Gold នឹងជំនួសពណ៌មាស Rose Gold សម្រាប់ស៊េរី iPhone ឆ្នាំ២០១៧ នេះ។ iPhone ជំនាន់ថ្មី នឹងត្រូវ Apple សម្ពោធចេញក្នុងខែកញ្ញាខាងមុខ ដែលមានដល់ទៅ ៣ម៉ូដែលផ្សេងគ្នាគឺ iPhone 7s, iPhone 7s Plus និង iPhone 8 ដែលត្រូវបានផលិតជាពិសេសសម្រាប់អបអរខួប ១០ឆ្នាំនៃត្រកូលទូរស័ព្ទ iPhone។ មានការលើកឡើងថា iPhone 8 នឹងមិនថោកនោះទេ ដោយរំពឹងថា អាចមានតម្លៃចាប់ពីខ្ទង់ពាន់ដុល្លារ (ចាប់ពី $១០០០ ឬ $១១០០)៕
ប្រែសម្រួល៖ រឹទ្ធិរាជ
ប្រភព៖ phonearena
