Samsung ត្រៀមប្រកាសចេញខ្សែដៃ Gear Fit 2 Pro ដំណាលគ្នានឹង Note 8 នៅថ្ងៃ២៣ សីហាខាងមុខ តម្លៃក្រោម $១៨០
ខ្សែដៃសុខភាព Gear Fit 2 របស់ Samsung ត្រូវបានប្រកាសចេញកាលពីឆ្នាំមុន ហើយតាមសេចក្ដីរាយការណ៍នៅពេលនេះ គឺជឿថា ក្រុមហ៊ុនអេឡិចត្រូនិកយក្សកូរ៉េខាងត្បូងនេះ ក៏នឹងត្រៀមប្រកាសចេញ Gear Fit ជំនាន់ថ្មីមួយទៀត ដំណាលគ្នានឹង Galaxy Note 8 គឺ Gear Fit 2 Pro។ ក្រុមហ៊ុន Samsung បានអះអាងបញ្ជាក់នូវឈ្មោះឧបករណ៍ wearable ថ្មីរបស់ខ្លួន ហើយពេលនេះយើងក៏បានឃើញរូបបែកធ្លាយខ្សែដៃថ្មីនេះដែរហើយ និងអមមកជាមួយលក្ខណៈសម្បត្តិមួយចំនួន ចុះផ្សាយដោយគេហទំព័រ Venture Beat។
រូបគំរូដែលគេសន្និដ្ឋានជា Gear Fit 2 Pro
ខ្សែដៃ Gear Fit 2
ស្រដៀងគ្នានឹងខ្សែដៃជំនាន់មុន ដោយ Gear Fit 2 Pro អាចត្រូវបានបំពាក់មកជាមួយអេក្រង់កោង AMOLED (មិនទាន់ច្បាស់អំពីទំហំអេក្រង់ និង resolution) តែគេរំពឹងថា វាដំណើរការដោយប្រព័ន្ធប្រតិបត្តិការ Tizen OS ហើយអាចភ្ជាប់ប្រើជាមួយស្មាតហ្វូន Android និង iOS។ ខ្សែដៃសុខភាពថ្មីនេះ អាចបង្ហាញខ្លួនជាមួយមុខងារមិនជ្រាបទឹក 5ATM ដែលអាចធន់នឹងជម្រៅ ៥០ម៉ែត្រ ស័ក្ដសមសម្រាប់កីឡាករ ឬអ្នកចូលចិត្តហែលទឹក។
គំរូ Gear Fit 2 Pro
Gear Fit 2 Pro នឹងមានមុខងារ music playback (ដែលមិនធ្លាប់មាននៅលើ Gear Fit ម៉ូដែលមុន) ហើយគាំទ្រ offline Spotify tracks។ លើសពីនេះ ឧបករណ៍នេះ អាចត្រូវបានឌីហ្សាញឱ្យមានស្ទីលជាខ្សែដៃមើលម៉ោងបានថែមទៀត។ សេចក្ដីរាយការណ៍ថែមទាំងឱ្យដឹងថា ក្រុមហ៊ុន Samsung មានបំណងប្រកាសចេញ Gear Fit 2 Pro នៅថ្ងៃទី២៣ ខែសីហាខាងមុខ ដែលជាថ្ងៃសម្ពោធ Galaxy Note 8 តែម្ដង ហើយក៏មានឧបករណ៍ Gear VR ស៊េរីថ្មីអមជាមួយផងដែរ។ គេរំពឹងថា ខ្សែដៃ fitness ថ្មីនេះ នឹងមានតម្លៃមិនលើសពី តម្លៃ Gear Fit 2 ម៉ូដែលឆ្នាំ២០១៦ ដែលមានតម្លៃ ១៨០ដុល្លារនោះទេ៕ ប្រែសម្រួល៖ រឹទ្ធិរាជ ប្រភព៖ phonearena
