​យើង​ធ្លាប់​បាន​ឃើញ​វីដេអូ​ខ្លះៗ អំពី​ទីស្នាក់ការ​ថ្មី​រាង​មូល​ដូច​ថាសហោះ Spaceship Compus របស់ Apple កន្លង​មក​ហើយ ហើយ​នៅ​ពេល​នេះ គេ​បាន​ផ្ដិត​ចេញ​ជា​វីដេអូ​ថ្មី​មួយ​ទៀត ដែល​បង្ហាញ​នូវ​បច្ចុប្បន្នភាព​ថ្មី​ទៅ​លើ​ដំណាក់កាល​សាងសង់​ជិត​រួចរាល់​ ដែល​បាន​ចាប់ផ្ដើម​សាងសង់​តាំង​ពីរ ២-៣ឆ្នាំ​មុន​ម្ល៉េះ។ https://youtu.be/eyzvBKnVw98 ​ក្នុង​វីដេអូ​ចុងក្រោយ​នេះ បាន​ឱ្យ​យើង​ឃើញ​នូវ​ឧទ្យាន Apple Park ​តាំង​នៅ​សហរដ្ឋ​អាមេរិក ដែល​ផ្ដិត​យក​ជិត​នឹង​អគារ Steve Jobs Theater និង​អគារ​ជាច្រើន​ផ្សេង​ទៀត។ បុគ្គលិក​ក្រុមហ៊ុន Apple មួយ​ចំនួន ក៏​បាន​ចាប់ផ្ដើម​ធ្វើការ​ក្នុង​ស្នាក់ការ​ថ្មី​នេះ​ដែរ​ហើយ ជាមួយ​បន្ទប់​ការិយាល័យ​ការងារ​សម្រាប់​បុគ្គលិក​ប្រមាណ ១២០០០នាក់។

Apple Park ក៏​នឹង​បង្កើត​ជា​កន្លែង​អង្គុយ auitorium ​ចំនួន ១០០០កន្លែង ដែល​នឹង​ត្រូវ​គេ​ហៅ​ថា មហោស្រព​លោក Job “Steve Jobs Theater” ដើម្បី​ផ្ដល់​កិត្តិយស ដល់​អតីត​នាយក​ប្រតិបត្តិ និង​សហ​ស្ថាបនិក​របស់​ក្រុមហ៊ុន Apple។ ក្នុង​បរិវេណ ស្នាក់​ការ​ថ្មី​នេះ ក៏​នឹង​មាន​ហាង Apple Store និង​ហាង​កាហ្វេ​ ដែល​បើក​ជា​សាធារណៈ និង​មាន​អគារ​ស្រាវជ្រាវ និង​អភិវឌ្ឍ R&D ​ក៏​ដូច​ជា​មជ្ឈមណ្ឌល​ហាត់​កីឡា fitness center សម្រាប់​បុគ្គលិក Apple ផង​ដែរ។

អ្វី​ដែល​ពិសេស​នោះ ស្នាក់ការ Apple Park នឹង​ប្រើប្រាស់​ថាមពល​កកើត​ឡើង​វិញ ដោយ​ដំបូល​អគារ​នឹង​ក្រាល​ដោយ​បន្ទះ​សូឡា ដែល​នឹង​ផលិត​ថាមពល ១៧មេហ្គាវ៉ាត់ នឹង​ធ្វើ​ឱ្យ​ក្លាយ​ជា​សួន​ដំឡើង​ថាមពល​សូឡា​ធំ​បំផុត​លើ​ពិភពលោក។ Apple Park ត្រូវ​រំពឹង​ថា នឹង​សាងសង់​ចប់​សព្វគ្រប់​នៅ​មុន​ដំណាច់​ឆ្នាំ២០១៧ នេះ​ហើយ៕ ​ប្រែ​សម្រួល៖ រឹទ្ធិរាជ ប្រភព៖ Matthew Roberts, MacRumors