ក្រុមហ៊ុន Samsung ត្រៀមរៀបចំសន្និសីទមួយ សម្រាប់ការប្រកាសចេញស្មាតហ្វូនថ្មីរបស់ខ្លួន គឺ Galaxy Note 8 នៅថ្ងៃទី២៣ សីហានេះ។ ហើយសេចក្ដីរាយការណ៍ពីគណនី Evan Blass បានអះអាងឱ្យដឹងថា ស្មាតហ្វូនកូនកាត់ថេប្លេតថ្មីរបស់ក្រុមហ៊ុនកូរ៉េនេះ នឹងមានដាក់ឱ្យបញ្ជាទិញចាប់ពីថ្ងៃ២៤ សីហា គឺនៅក្រោយប្រកាសចេញបានមួយថ្ងៃ។
ដូច្នេះ ប្រសិននេះជាព័ត៌មានពិត ក្រុមហ៊ុន Samsung នឹងចាប់ផ្ដើមទទួលការកក់ទុកនូវផេប្លេតថ្មីរបស់ខ្លួន ចាប់ពីថ្ងៃ២៤ សីហា ហើយនឹងមានលក់លើទីផ្សារចាប់ពីថ្ងៃ១៥ កញ្ញា។ Galaxy Note 8 នឹងបង្ហាញខ្លួនអមដោយលក្ខណៈសម្បត្តិគួរឱ្យចាប់អារម្មណ៍មួយចំនួន។ អេក្រង់ Note 8 នឹងមានទំហំ ៦,៣អ៊ីញកម្រិត Quad HD+ (2960x1440)px ប្រើឈីប Qualcomm Snapdragon 835 (សម្រាប់ទីផ្សារមួយចំនួន) និងឈីប Exynos 8995 លើទីផ្សារផ្សេងទៀត។
លក្ខណៈសម្បត្តិផ្សេងទៀត ដែលរំពឹងមាននៅលើ Note 8 ៖ មាន RAM 6GB អង្គចងចាំទំហំចាប់ពី 64GB, 128GB និងមានជម្រើសដល់ 256GB។ ផេប្លេតនេះ ក៏នឹងបំពាក់ជាមួយកាមេរ៉ាសមត្ថភាពខ្ពស់ ជាកាមេរ៉ាភ្លោះនៅខាងក្រោយ ដែលមានទំហំ 12MP sensors ទាំងពីរគ្រាប់ តែមួយក្នុងចំណោមនោះ នឹងមាន telephoto lens ខណៈមួយផ្សេងទៀតគឺ wide angle lens៕
ប្រែសម្រួល៖ រឹទ្ធិរាជ
ប្រភព៖ Evan Blass, GSM Arena
