អ្នក​ប្រើ​ផលិតផល​របស់ Apple ប្រហែល​សុទ្ធតែ​ដឹង​ច្បាស់​អំពី​ទំហំ​អេក្រង់​នៅ​លើ​ទូរស័ព្ទ iPhone របស់​ខ្លួន ហើយ​អ្នក​ខ្លះ ប្រើ​អេក្រង់​ធំ​ស៊េរី Plus និង​ខ្លះ​ទៀត​ចូលចិត្ត​ទំហំ​តូច ស្រួល​ដាក់​តាម​ខ្លួន។ កាលពី​ខែ​មិថុនា កន្លង​ទៅ​មាន​ការ​បែកធ្លាយ​នូវ​វិមាត្រ​របស់​ iPhone 7s ទាំង​ពីរ​ម៉ូដែល និង iPhone 8។ ហើយ​ឥឡូវ​នេះ យើង​ចូល​កាន់តែ​កៀក​ទៅ​នឹង​ដំណឹង​ច្បាស់​ការណ៍​អំពី​វិមាត្រ​របស់​វា​មែនទែន​ហើយ។

តាម​ប្រភព​បែកធ្លាយ​ពី​គេហទំព័រ technobuffalo បង្ហាញ​ឱ្យ​ឃើញ​នូវ​បញ្ជី​ស្ដី​ពី​វិមាត្រ (កម្ពស់ ទទឹង និង កម្រាស់) ដែល​មាន​បញ្ជាក់​យ៉ាង​ច្បាស់​ទៅ​លើ ស៊េរី iPhone 7s និង iPhone 7s Plus ប្រៀបធៀប​នឹង 7 និង 7 Plus បច្ចុប្បន្ន។ មើល​តាម​តារាង​ខាង​លើ​បង្ហាញ​ថា ​វិមាត្រ​រវាង 7s និង 7 ហើយ​និង 7s Plus និង 7 Plus ហាក់​មិន​ខុស​គ្នា​ឆ្ងាយ​នោះ​ទេ។

កម្ពស់ iPhone 7s ​គឺ 138.44mm ខណៈ iPhone 7 ​មាន 138.3mm។ ចំណែក​ទទឹង iPhone 7s ​គឺ 67.26mm ​ចំណែក iPhone 7 ​គឺ 67.1។ ងាក​មក​មើល​កម្រាស់​វិញ iPhone 7s ​ក្រាស់​ជាង iPhone 7 ​​បន្តិច​គឺ 7.21mm ទល់​នឹង 7.1mm។ មិន​ខុស​គ្នា​ចំពោះ​ការ​ប្រៀបធៀប​ទៅ​លើ iPhone 7s Plus និង 7 Plus ​ទេ គឺ​ទាំង កម្ពស់ ទទឹង និង​កម្រាស់​របស់ iPhone 7s Plus សុទ្ធតែ វែង​ជាង និង​ក្រាស​ជាង​នៅ​លើ iPhone 7 Plus។ iPhone ថ្មី​ចំនួន ៣ម៉ូដែល រួម​មាន iPhone 7s, 7s Plus និង iPhone 8 ត្រូវ​គេ​រំពឹង​ថា នឹង​បង្ហាញ​វត្តមាន​ផ្លូវការ​នៅ​ថ្ងៃ​ទី១២ កញ្ញា​ខាង​មុខ ក្នុង​ព្រឹត្តិការណ៍​មួយ​របស់ Apple៕ ​ប្រែ​សម្រួល៖ រឹទ្ធិរាជ ប្រភព៖ technobuffalo