ហេតុផល៣ធំៗដែលអ្នកគួរដើរលេងជាមួយមិត្តភ័ក្ដិឲ្យបានច្រើន
ពិតប្រាកដណាស់ មនុស្សយើងម្នាក់ៗមានទំនួលខុសត្រូវជាច្រើនដែលត្រូវបំពេញក្នុងជីវិតដូចជាការសិក្សា ការងារនិងតួនាទីជាកូន។ល។ យើងទាំងអស់គ្នាសុទ្ធតែរវល់។ បន្ថែមពីលើនេះទៅទៀតជីវិតក៏ពោរពេញទៅដោយបញ្ហានិងភាពមិនសប្បាយចិត្តជាច្រើន។ ដូច្នេះហើយទើបអ្នកគួរតែលៃលកពេលវេលាខ្លះសម្រាប់ដើរលេងជាមួយមិត្តភ័ក្ដិព្រោះការដើរលេងនាំយកមកនូវអត្ថប្រយោជន៍ដូចខាងក្រោម៖
១) ភាពរីករាយ៖ ការដើរលេងជាមួយមិត្តភ័ក្ដិគឺជាថ្នាំទិព្យមួយជួយឲ្យអ្នករីករាយនិងភ្លេចនូវទុក្ខកង្វល់។ ប្រសិនអ្នកមិនរីករាយ វាជាសញ្ញាមួយដែលអ្នកគួរបញ្ចេញភាពមិនរីករាយចេញមកខាងក្រៅនិងត្រូវមានភាពសប្បាយរីករាយម្ដងហើយ។ ហើយមិត្តភ័ក្ដិអាចធ្វើឲ្យរីករាយវិញបាន។
២)បង្កើនមិត្តភាព៖ ក្នុងសម័យបច្ចេកវិទ្យានេះ មនុស្សជាច្រើនជ្រើសរើសវិធីជជែកគ្នាតាមរយៈបណ្ដាញសង្គមអ៊ីនធឺណិតវិញ។ បើទោះបីជាអ្នកអាចទំនាក់ទំនងតាមបណ្ដាញសង្គមអ៊ីនធឺណិត ប៉ុន្តែទំនាក់ទំនងមុខនិងមុខគឺមានប្រសិទ្ធភាពព្រោះវាជួយឲ្យមិត្តភាពមានភាពជិតស្និទ្ធ។ បន្ថែមពីនេះ អ្នកក៏អាចថតរូបជាមួយនឹងគ្នា ដែលបន្សល់ទុកនូវអនុស្សាវរីយ៍ល្អៗជាច្រើន។
៣) រៀនពីគ្នា៖ ពេលខ្លះ បើទោះបីជាអ្នកដើរលេងដើម្បីតែភាពរីករាយ ប៉ុន្តែពេលខ្លះអ្នកក៏អាចនិយាយដល់ប្រធានបទស៊ីជម្រៅ មានន័យថាអ្នកនិយាយពីប្រធានបទដែលមានប្រយោជន៍ដល់ជីវិត។ ដូច្នេះហើយ អ្នកនិងមិត្តភ័ក្ដិអាចចែករំលែកចំណេះដឹងនិងរៀនសូត្រពីគ្នា៕
ដោយ៖អុឹង មុយយូ
