iPhone 8 របស់ Apple នឹងត្រូវក្រុមហ៊ុនប្រកាសផ្លូវការនៅសប្ដាហ៍ក្រោយគឺនៅក្នុងព្រឹត្តិការណ៍ថ្ងៃទី១២ កញ្ញា ហើយនៅពេលនេះ Foxconn ទំនងចាប់ផ្ដើមចែកចាយលក់កំពូលស្មាតហ្វូនជំនាន់ថ្មីនេះ មុនត្រូវ Apple សម្ពោធមួយសប្ដាហ៍។
រូបថតមួយចំនួន ត្រូវបានបង្ហោះនៅលើប្រព័ន្ធអ៊ីនធឺណិត ដែលបង្ហាញឱ្យឃើញនូវ iPhone ជំនាន់ថ្មី គឺ iPhone 8 ពីក្នុងរោងចក្រ Foxconn នៅសួន Zengzhou Technology Park។ Apple នឹងបង្ហាញវត្តមាន iPhone 8 ជាផ្លូវការនៅថ្ងៃអង្គារសប្ដាហ៍ក្រោយ គឺចំថ្ងៃទី១២ ខែកញ្ញា ហើយគេរំពឹងថា ក្រុមហ៊ុននឹងចាប់ផ្ដើមដាក់ឱ្យបញ្ជាទិញស្មាតហ្វូនថ្មីនេះ នៅថ្ងៃសុក្រទី១៥ ក្រោយប្រកាសបានតែប៉ុន្មានថ្ងៃប៉ុណ្ណោះ។
iPhone 8 ថែមទាំងត្រូវគេរំពឹងថា នឹងមានលក់លើទីផ្សារមួយចំនួនចាប់ពីថ្ងៃសុក្រ ទី២២ កញ្ញា តែទោះជាយ៉ាងណា កាលបរិច្ឆេទនេះ មិនទាន់ត្រូវបានអះអាងដោយក្រុមហ៊ុន Apple នៅឡើយនោះទេ។ យើងនឹងមានព័ត៌មានលំអិតអំពី iPhone ជំនាន់ថ្មីរបស់ Apple ហើយនឹងបន្តចុះផ្សាយជុំវិញព័ត៌មានទាំងឡាយអំពីស្មាតហ្វូនកំពូលថ្មីនេះ។
ក្រុមហ៊ុន ថែមទាំងត្រូវគេរំពឹងថា នឹងបង្ហាញសមិទ្ធផលថ្មីៗផ្សេងទៀតក្រៅពី iPhone 8 គឺមាន៖ នាឡិកាទំនើប LTE Apple Watch, 4K Apple TV និង iPhone 7s និង iPhone 7s Plus ក្នុងព្រឹត្តិការណ៍ថ្ងៃទី១២ កញ្ញាខាងមុខ៕
ប្រែសម្រួល៖ រឹទ្ធិរាជ
ប្រភព៖ Techtastic
