គណៈកម្មការសហព័ន្ធពាណិជ្ជកម្ម FTC បានធ្វើការដោះស្រាយបណ្ដឹងលើប្រព័ន្ធសូហ្វ៊ែរដំឡើងស្រាប់ (pre-loaded software) បន្ទាប់ពីរកឃើញមានកុំព្យូទ័រ Laptop របស់ក្រុមហ៊ុន Lenovo ប្រមាណ ៧៥០០០០ គ្រឿងបានបង្កប់នូវសូហ្វ៊ែរតោងជាមួយមេរោគ spyware និង adware។ អគ្គមេធាវីនៅរដ្ឋចំនួន៣២ បានចូលរួមជាមួយ FTC និងបានព្រមព្រៀងគ្នា ធ្វើការពិន័យជាទឹកប្រាក់ ៣,៥លានដុល្លារអាមេរិក។ កុំព្យូទ័រយួរដៃ ដែលមានបង្កប់សូហ្វ៊ែរមេរោគ គឺបានចែកចាយលក់ក្នុងចន្លោះពី ខែសីហា ឆ្នាំ២០១៤ ទៅ ខែមិថុនា ឆ្នាំ២០១៥ ដែល Laptop ទាំងនោះត្រូវបានដំឡើងស្រាប់ៗនូវកម្មវិធីមួយឈ្មោះថា VisualDiscovery។
សេចក្ដីរាយការណ៍ថ្មីនេះឱ្យដឹងថា កម្មវិធី VisualDiscovery ដែលគេអះអាងថា មានបង្កប់មេរោគ គឺផលិតដោយក្រុមហ៊ុនសូហ្វ៊ែរនៅកាលីហ្វ័រញ៉ាឈ្មោះ Superfish។ កម្មវិធីនេះ អាចវិភាគលើផ្ទៃអេក្រង់កុំព្យូទ័រអ្នកប្រើ និងលើកម្មវិធី web browsing គោលបំណងដើម្បីផ្សព្វផ្សាយពាណិជ្ជកម្មចំគោលដៅ។ ប្រសិនសូហ្វ៊េរនេះ រកឃើញថា អ្នកប្រើកំពុងបើកមើលរូបផលិតផលណា ឬ online shopping ណា វានឹងបង្ហាញចេញនូវផ្ទាំងពាណិជ្ជកម្មលោតឡើង (pop-up ads) នៅក្នុង browser សម្រាប់ផលិតផលដែលមានលក្ខណៈ ស្រដៀងគ្នា ដែលលក់ដោយដៃគូលក់ផលិតផលរបស់ Superfish។ ខាងក្រោមនេះជាម៉ូដែល Laptop ដែលមានបង្កប់សូហ្វ៊ែរដំឡើងស្រេច VisualDiscovery ៖
ចុះម៉េចក៏ spyware នេះ អាចកើតមាននៅលើ Laptop ក្រុមហ៊ុន Lenovo រហូតរាប់រយ រាល់ពាន់ទៅកើត? យោងតាម Lenovo បានឱ្យដឹងថា ក្រុមហ៊ុនមិនបានដឹងអំពីវត្តមាន spyware នេះនោះទេ។ ជាមួយសូហ្វ៊ែរប្រភេទ third-party នេះ Lenovo បានដំឡើងនៅលើ Laptop របស់ខ្លួន ដោយគ្មាននរណាឆែកមើល ថាតាមពិត Superfish បានធ្វើអ្វីនៅលើនោះសោះ ហើយបែបនេះ ក៏អាចធ្វើឱ្យកើតក្ដីបារម្ភចំពោះភាពជាឯកជន (privacy concern) របស់អ្នកប្រើផងដែរ។
ទោះបីមាន Laptop ជាច្រើនម៉ូដែលទទួលរងផលប៉ះពាល់ដោយសូហ្វ៊ែរនេះ តែ FTC មិនមានសិទ្ធក្នុងការពិន័យ Lenovo នោះឡើយ នេះគឺដោយសារការចេញមុខពីមេធាវីច្រើនរូប ធ្វើការដាក់ស្នើប្រាក់ពិន័យទៅ Lenovo។ ប្រសិនបើ Lenovo បំពានលើលក្ខខណ្ឌនៃការទូទាត់នេះ ទើប FTC អាចចាប់ផ្ដើមពិន័យបាន។
ចាប់ពីពេលនេះតទៅ Lenovo នឹងត្រូវមានការស្នើសុំសិទ្ធិពីអ្នកប្រើប្រាស់ជាមុនសិន នៅពេលដំឡើងសូហ្វ៊ែរទាំងឡាយណា ដែលធ្វើការប្រមូល និងផ្ញើទិន្នន័យផ្ទាល់ខ្លួនរបស់អ្នកប្រើទៅកាន់ក្រុមហ៊ុនមួយផ្សេងទៀតដូច្នេះ៕
ប្រែសម្រួល៖ រឹទ្ធិរាជ
ប្រភព៖ techspot
