Apple ក្រៅពីវែកមុខកំពូលទូរស័ព្ទ iPhone ថ្មីទាំង ៣ម៉ូដែលហើយ ក៏មាននាឡិកាឆ្លាតវៃ Apple Watch បង្ហាញសាធារណជនផងដែរ។ វាជា Apple Watch Series 3។ ក្នុងព្រឹត្តិការណ៍យប់មិញ ក្រុមហ៊ុនថែមទាំងបានប្រកាសឱ្យដឹងជាសាធារណៈនូវចំណែកទីផ្សារដ៏ខ្លាំងរបស់ Apple Watch គឺជាប់លេខ១ លើពិភពលោក គឺបានយកឈ្នះទាំងម៉ាកនាឡិកាល្បី Rolex។
https://youtu.be/jUvD80mNKBM
ក្រុមហ៊ុន Apple បានធ្វើការបន្ថែមនូវមុខងារថ្មីៗមួយចំនួនពីលើនាឡិកា Apple Watch ដែលមានក្នុងពេលបច្ចុប្បន្ន ដើម្បីឱ្យ Apple Watch Series 3 រឹតតែទំនើប ទាន់សម័យ ក្នុងនោះក៏បានកែលំអលើមុខងារត្រួតពិនិត្យចង្វាក់បេះដូង និងជាច្រើនទៀត។ មុខងារថ្មីមួយក្នុងចំណោមមុខងារដទៃទៀត គឺ Apple Watch នឹងអាចផ្ដល់ការប្រាប់ដំណឹងភ្លាមៗ ពេលណាដែលចង្វាក់បេះដូងបុកឡើង និងបេះដូងដំណើរការមិនប្រក្រតី (មិនដំណើរការ)។
https://youtu.be/N-x8Ik9G5Dg
Apple Watch Series 3 មាននូវប្រព័ន្ធតំណភ្ជាប់ cellular មកជាស្រេច មានន័យថា អ្នកនឹងអាចប្រើនាឡិកា smartwatch ថ្មីនេះ ដោយមិនចាំបាច់មាន iPhone ទៀតនោះទេ។ អ្នកនឹងអាចទទួលការខលទូរស័ព្ទចូល នៅលើ Apple Watch Series 3 នៅពេលអ្នកនៅឆ្ងាយពី iPhone បានគ្រប់ពេល។ អ្នកថែមទាំងអាច stream Apple Music ទៅកាន់ Apple Watch ដោយផ្ទាល់បានផងដែរ។
នាឡិកា Apple Watch ជំនាន់ថ្មីនេះ ប្រើអង្គប្រតិបត្តិ dual core ថ្មី ដែលមានដំណើរការល្អជាងមុន ៧០% (ល្អជាង Apple Watch ជំនាន់មុន) ។ Apple ក៏បានប្រកាសចេញខ្សែនាឡិកាថ្មី សម្រាប់ប្រើជាមួយ Apple Watch ថ្មីផងដែរ គឺមានខ្សែនាឡិកាស្ទីល Nike និងម៉ូតផ្សេងៗទៀត។ វានឹងមានដំណើរការជាមួយប្រព័ន្ធប្រតិបត្តិការ Watch OS 4 ហើយមានកម្លាំងថ្មប្រើបានពេញមួយថ្ងៃតែម្ដង។
Apple Watch Series 3 បែងចែកជាពីរម៉ូដែល មួយគឺ Cellular តម្លៃ ៣៩៩ដុល្លារ និងមួយទៀតគ្មាន Cellular តម្លៃតែ ៣២៩ដុល្លារ។ Apple នឹងចាប់ផ្ដើមដាក់ឱ្យកុម្ម៉ង់ទិញចាប់ពីថ្ងៃសុក្រ ទី១៥ កញ្ញានេះ ហើយនឹងមានលក់ចាប់ពីថ្ងៃ២២ កញ្ញាតទៅ៕
ប្រែសម្រួល៖ រឹទ្ធិរាជ
ប្រភព៖ Apple
