អាច​ជា​សញ្ញា​វិជ្ជមាន​មួយ​សម្រាប់​ការ​ចែកចាយ​លក់​ស្មាតហ្វូន​កាត់​ថេប្លេត​ស៊េរី​ថ្មី Galaxy Note 8 ​របស់ Samsung ដោយ​របាយការណ៍​ថ្មី​នេះ ឱ្យ​ដឹង​ថា ចំនួន​កក់​ទុក Note 8 ពី​អតិថិជន​បាន​កើនឡើង​ដល់ ៨០ម៉ឺន​គ្រឿង​ គិត​តែ​នៅ​ទីផ្សារ​កូរ៉េ​ខាង​ត្បូង​ប៉ុណ្ណោះ។

យើង​ទើប​បាន​ឮ​ដំណឹង​ប៉ុន្មាន​ថ្ងៃ​មុន​ថា Samsung ទទួល​បាន​ការ​បញ្ជា​ទិញ​ចំនួន​យ៉ាង​គំហុក​លើ​ផេប្លេត​ថ្មី​របស់​ខ្លួន​នៅ​អាមេរិក ហើយ​ពេល​នេះ សញ្ញា​បូក ​បន្ត​កើត​មាន​នៅ​ទឹក​ដី​កំណើត​របស់​ក្រុមហ៊ុន​កូរ៉េ​នេះ​ថែមទៀត។ របាយការណ៍​ថ្មី​នេះ បង្ហាញ​ថា Note 8 ពិត​ជា​ទទួល​បាន​ការ​គាំទ្រ​ខ្លាំង ដោយ​មាន​ចំនួន​កុម្ម៉ង់​ទុក​ពី​អតិថិជន​ប្រមាណ​ដល់​ ៨០ម៉ឺន​គ្រឿង។

ក្រុមហ៊ុន Samsung បាន​ចាប់ផ្ដើម​ដាក់​ឱ្យ​កុម្ម៉ង់​កក់​ទុក Galaxy Note 8 ​តាំង​ពី​ថ្ងៃ​ទី៧ កញ្ញា​កន្លង​មក ហើយ​មក​ដល់​ពេល​នេះ ក្រុមហ៊ុន​ទទួល​បាន​ការ​ចុះឈ្មោះ​ចាំ​ទិញ​ពី​អតិថិជន​ក្នុង​ចំនួន​ដ៏​ច្រើន ដល់ ៨០ម៉ឺន​គ្រឿង​គិត​តែ​នៅ​កូរ៉េ​ខាង​ត្បូង​។ នេះ​ជា​ចំនួន​កើន​ឡើង​ទ្វេដង បើ​ប្រៀបធៀប​នឹង Note ជំនាន់​មុន ដែល​ទទួល​បាន​ការ​កក់​ទុក​ត្រឹម 380,000 គ្រឿង នៅ​រយៈពេល ១៣ថ្ងៃ។ Samsung ជួប​បញ្ហា​ដោយសារ Galaxy Note 7 កាលពី​ឆ្នាំ​មុន ដោយ​ទូរស័ព្ទ​មាន​បញ្ហា​ថ្ម​ធ្ងន់ធ្ងរ​រហូត​ត្រូវ​បង្ខំ​ចិត្ត​ប្រមូល​ចូល​ក្រុមហ៊ុន​វិញ។ ចំណែក Note 8 នេះ ហាក់​មិន​មាន​បញ្ហា​អ្វី​កើត​មាន​នោះ​ឡើយ ឬ​ដោយ​សារ​វា​ស្ថិត​ក្នុង​ខណៈ​ពេល​បញ្ជា​ទិញ ដោយ​មិន​ទាន់​ដល់​ដៃ​អតិថិជន​ប្រើប្រាស់​នៅ​ឡើយ ទើប​បញ្ហា​មិន​ទាន់​រក​ឃើញ​ក៏​ថា​បាន។ យ៉ាងណា គេ​ជឿជាក់​ថា បញ្ហា​នឹង​មិន​កើត​ឡើង​នៅ​លើ​ថ្ម​ដូច Note 7 ទៀត​នោះ​ទេ៕ ​ប្រែ​សម្រួល៖ រឹទ្ធិរាជ ប្រភព៖ Sammobile