ក្រុមហ៊ុនអវកាសឯកជនខ្លះ ដែលមានមូលដ្ឋាននៅសហរដ្ឋអាមេរិក កំពុងធ្វើការលើគម្រោងដែលនឹងទៅរកការអភិវឌ្ឍវិស័យទេសចរណ៍អវកាស។ អ្នកទេសចរត្រូវការសណ្ឋាគារ ដូច្នេះសហព័ន្ធអវកាសរុស្ស៊ី Roscosmos បានស្នើឱ្យមានការសាងសង់សណ្ឋាគារមួយនៅស្ថានីយអវកាសអន្តរជាតិ។
វានឹងមិនមានតម្លៃថោកនោះទេ។ យោងតាមសំណើដាក់ចេញនេះ ភ្ញៀវទេសចរអវកាសនឹងត្រូវចំណាយយ៉ាងហោច ៤០លានដុល្លារសម្រាប់បទពិសោធន៍ដំណើរទស្សនកិច្ចនៅសណ្ឋាគារអវកាសរយៈពេល ១សប្ដាហ៍។ អ្នកអាចចំណាយប្រាក់ ២០លានដុល្លារបន្ថែមទៀតដើម្បីដើរលើឋានអវកាសជាមួយអវកាសយានិកផងដែរ។ ប្រាកដណាស់ សេវាកម្មបែបនេះ មានតែអ្នកមានទ្រព្យសម្បត្តិចាយមិនអស់ ឬមហាសេដ្ឋីប៉ុណ្ណោះទើបហ៊ានចំណាយ។
ផែនការនេះត្រូវបានបង្កើតឡើងដោយអ្នកម៉ៅការអវកាស RKK Energia របស់រុស្ស៊ី ដែលជាមធ្យោបាយសម្រាប់ការចំណាយសាងសង់ម៉ូឌុលទីពីរ ដែលនឹងត្រូវចំណាយរហូតដល់ ៤៤៦លានដុល្លារ។ អ្នកម៉ៅការបានចាប់ផ្ដើមដំណើរការម៉ូឌុលដំបូងក្នុងចំណោមម៉ូដែលចំនួន២ ដែលនឹងសាងសង់មន្ទីរពិសោធន៍វិទ្យាសាស្ត្រ និងស្ថានីយផ្គត់ផ្គង់ថាមពល។ វាមើលទៅដូចជា រដ្ឋាភិបាលរុស្ស៊ីនឹងបង់ថ្លៃម៉ូដែលទី១ ដូច្នេះអ្នកម៉ៅការត្រូវតែគិតពីរបៀបដែលនឹងត្រូវចំណាយសម្រាប់ការសាងសង់ម៉ូឌុលទី២ ជាបន្ត។
សណ្ឋាគារនេះនឹងមានកន្លែងគេងចំនួន៤ ទីតាំង មានប្រវែងពីរម៉ែត្រគូប ហើយមានបង្អួចទំហំ ៩អ៊ីញ និងកន្លែងកម្សាន្តដែលមានបង្អួច ១៦អ៊ីញចំនួនមួយ។ ម៉ូឌុលនេះក៏មានស្ថានីយសុខភាព និងអនាម័យផងដែរ៕
ដោយ៖ រឹទ្ធិរាជ
ប្រភព៖ Ubergizmo
