រយៈពេល​ទើបតែ ៣ខែ​បន្ទាប់​ពី​ក្រុមហ៊ុន Samsung ​បញ្ចេញ​លក់ Galaxy Note 8 ឥឡូវ​នេះ ស្រាប់តែ​មាន​សេចក្ដី​រាយការណ៍​ពី​ម្ចាស់​ផេប្លេត​ទំនើប​នេះ​ខ្លះ ​ទាក់ទិន​នឹង​បញ្ហា​ថ្ម។ នៅ​ក្នុង​ទំព័រ​ពិភាក្សា​ផ្លូវការ (forum) របស់ Samsung ​និង​ប្រភព​ព័ត៌មាន​ផ្សេងៗ សុទ្ធតែ​មាន​ការ​លើកឡើង​នូវ​បញ្ហា​ថ្ម Note 8 ​កើត​មាន​នៅ​ពេល​អ្នក ប្រើ​វា​រហូត​អស់​ថ្ម​រលីង​នៅ ០% (សូន្យ)។ https://youtu.be/5Q7mKQmNWSE របាយការណ៍​បាន​អះអាង​ថា Note 8 នឹង​រលត់​បើក (turn on) មិន​ចេញ ទោះបី​ដោត​សាកថ្ម​ក៏​ដោយ ហើយ​ក៏​មាន​សញ្ញាណ​បញ្ជាក់​នូវ​កម្រិត​ថ្ម​នោះ​ទេ។ គេ​សង្កេត​ឃើញ​រូប​សញ្ញា​សាក​ថ្ម (charging icon) ​បង្ហាញ​នៅ​លើ​អេក្រង់ នៅ​ពេល​ដាក់ Note 8 ​សាកថ្ម​នៅ​លើ​ទ្រនាប់​សាក Wireless Charger ​ឬ​ដោត​នឹង​ហ្វ្រី​ភ្លើង ប៉ុន្តែ​វា​មិន​សាក ហើយ​នៅ​តែ​បើក​មិន​ចេញ។ ម្ចាស់ Galaxy Note 8 ​ម្នាក់​បាន​បង្ហោះ​វីដេអូ លើកឡើង​អំពី​បញ្ហា​ថ្ម​លើ​ទូរស័ព្ទ​របស់​ខ្លួន​នៅ​ក្នុង YouTube ដែល​ជា​ម៉ូដែល Sprint ត្រូវ​បុរស​ម្នាក់​ព្យាយាម​ដាក់​សាក​ថ្ម តែ​សាក​មិន​ចូល ហើយ​ព្យាយាម​ចុច​បើក នៅ​ពេល​ទូរស័ព្ទ​អស់​ថ្ម​រលីង​។ មាន​មតិ​ខ្លះ​លើកឡើង​ថា Note 8 ក្លាយ​ជា​ដុំ​ថ្ម ប្រសើរ​ជាង​ផ្ទុះ​ឆេះ ដូច Galaxy Note 7 ។ យ៉ាងណា បញ្ហា​នេះ​កើត​មាន​តែ​នៅ​លើ​ម្ចាស់ Galaxy Note 8 មួយ​ចំនួន​ប៉ុណ្ណោះ។ តាម​ការ​បញ្ជាក់​នៅ​ក្នុង​គេហទំព័រ techspot ឱ្យ​ដឹង​ថា មិន​ត្រឹមតែ Note 8 ទេ​ដែល​មាន​បញ្ហា​បែប​នេះ ចំណែក Galaxy S8 Plus ក៏​មាន​សេចក្ដី​រាយការណ៍​ថា កើត​បញ្ហា​ដូច​គ្នា​នេះ​ដែរ។ ​នៅ​ក្នុង​សេចក្ដី​ថ្លែងការណ៍​មួយ ក្រុមហ៊ុន Samsung បាន​លើកឡើង​ថា ខ្លួន​នៅ​មិន​ទាន់​ទទួល​បាន​ព័ត៌មាន​ផ្លូវការ​ណាមួយ​អំពី​បញ្ហា​នេះ​នៅ​ឡើយ។ “យើង​មិន​ទាន់​ទទួល​បាន​របាយការណ៍​ផ្លូវការ​អំពី​បញ្ហា​នេះ​នោះ​ទេ ហើយ​យើង​មិន​អាច​ធ្វើ​អត្ថាធិប្បាយ​បាន​ទេ រហូត​ទាល់តែ​យើង​ទទួល​បាន​ព័ត៌មាន​ច្បាស់លាស់​បន្ថែម​សិន។ អតិថិជន​ណា​ដែល​មាន​បញ្ហា​ស្រដៀង​គ្នា​នេះ ត្រូវ​បាន​លើក​ទឹកចិត្ត​ឱ្យ​ទាក់ទង​មក​ក្រុមហ៊ុន Samsung ​នៅ​ផ្នែក Customer Care ​នៅ​តាម​ទីផ្សារ​ក្នុង​ស្រុក​ដែល​អ្នក​ជិត​លោក​អ្នក”៕ ​ដោយ៖ រឹទ្ធិរាជ ប្រភព៖ techspot