Apple ចេញសេចក្ដីថ្លែងការណ៍សុំអភ័យទោស ដែលខ្លួនបានទម្លាក់ speed លើ iPhone ចាស់ៗព្រោះគ្រាន់តែចង់ដោះស្រាយបញ្ហាថ្ម
រយៈពេលពីរបីសប្ដាហ៍ក្រោយចុងក្រោយនេះ មានការពិភាក្សាជាច្រើន ទាក់ទិនរឿងរ៉ាវដែលក្រុមហ៊ុន Apple បានទម្លាក់ល្បឿនដំណើរការលើ iPhone ស៊េរីចាស់ៗ។ ក្រុមហ៊ុននេះបានបន្ទាបល្បឿនដំណើរការលើទូរស័ព្ទជំនាន់មុនៗ ដែលមានកម្លាំងថ្មអន់ថយ ដើម្បីដោះស្រាយបញ្ហាថ្មកន្លងមកដែលអាចធ្វើឱ្យទូរស័ព្ទរលត់ដោយចៃដន្យ។
ឥឡូវនេះ Apple បានចេញសេចក្ដីថ្លែងការណ៍សុំអភ័យទោសជាសាធារណៈនៅលើគេហទំព័ររបស់ខ្លួន ហើយក្រុមហ៊ុនកំពុងប្រឈមនឹងបណ្ដឹងមួយចំនួនដោយសារការបន្ថយល្បឿនដំណើរការរបស់ iPhone ចាស់ៗ ដែលធ្វើឱ្យប៉ះពាល់ដល់អារម្មណ៍អ្នកប្រើ។ ខាងក្រោមនេះជាសេចក្ដីថ្លែងការណ៍ពី Apple៖
“យើងសូមទោស។ មានការយល់ច្រឡំច្រើនអំពីបញ្ហានេះ ដូច្នេះយើងចង់បញ្ជាក់ និងអនុញ្ញាតឱ្យអ្នកដឹងអំពីការផ្លាស់ប្ដូរមួយចំនួនដែលយើងកំពុងធ្វើ”។ ក្រុមហ៊ុនបន្ថែមថា៖ “ជាដំបូង និងសំខាន់បំផុត យើងមិនធ្លាប់ និងមិនដែលធ្វើអ្វីមួយជាចេតនាដើម្បីធ្វើឱ្យ អាយុកាលកាន់តែខ្លី នៃការប្រើប្រាស់ឧបករណ៍អេឡិចត្រូនិករបស់យើង ឬប៉ះពាល់ដល់បទពិសោធន៍នៃការប្រើទូរស័ព្ទ iPhone តាមរយៈកំណែប្រែកញ្ចប់សូហ្វ៊ែរជំនាន់ថ្មីនោះទេ។ គោលដៅរបស់យើងគឺបង្កើតផលិតផលដែលអតិថិជនស្រលាញ់ពេញចិត្ត និងធ្វើឱ្យអាយុកាលថ្មលើឧបករណ៍ ជាផ្នែកសំខាន់ដើម្បីប្រើប្រាស់បានយូរ“។
ក្រៅពីការសុំអភ័យទោស ក្រុមហ៊ុន Apple ពេលនេះចាប់ផ្ដើមផ្ដល់ជូនអតិថិជនដែលជួបបញ្ហានេះ អាចផ្លាស់ប្ដូរថ្មថ្មី ជាមួយការបញ្ចុះតម្លៃ។ តម្លៃថ្មថ្មីរបស់ iPhone គឺ ៧៩ដុល្លារ ប៉ុន្តែ Apple នឹងលក់ជូនអតិថិជនតម្លៃត្រឹមតែ ២៩ដុល្លារ ប៉ុណ្ណោះ៕
ដោយ៖ រឹទ្ធិរាជ
ប្រភព៖ Apple
