ក្រុមហ៊ុន​ស្រាវជ្រាវ​មួយ​ដែល​មាន​ឈ្មោះ​ថា GBH Insights ​បាន​ឱ្យ​ដឹង​កាលពី​ថ្មីៗ​នេះ​ថា iPhone ​គឺ​ជា​ផលិតផល​បច្ចេកវិទ្យា​លក់​ដាច់​បំផុត​នៅ​ឆ្នាំ​២០១៧។ ទូរស័ព្ទ iPhone ​ប្រមាណ ២៣៣លាន​គ្រឿង​ត្រូវ​បាន​រំពឹង​ថា បាន​ចរាចរ​នៅ​លើ​ទីផ្សារ​ក្នុង​ឆ្នាំ​នេះ។ ចំណែក​លេខ២ ​គឺ​ជា​ស្មាតហ្វូន Samsung Galaxy S8 និង Galaxy Note 8 ដែល​លក់​ដាច់​ប្រមាណ ៣៣លាន​គ្រឿង​ក្នុង​ឆ្នាំ២០១៧។ រីឯ​ឧបករណ៍​បំពងសម្លេង​ឆ្លាតវៃ (Smart Speaker) របស់​ក្រុមហ៊ុន Amazon ​ដែល​ជា Echo Dot ​មាន​ចំណាត់ថ្នាក់​លេខ៣ ដែល​លក់​ត្រូវ​បាន​ចែកចាយ​លក់ ២៤លាន​គ្រឿង។

ឆ្នាំ​នេះ ក្រុមហ៊ុន Apple ​ធ្វើ​បាន​យ៉ាង​ល្អ ព្រោះ​ក្រៅពី​ទទួល​បាន​ងារ​ជា​ក្រុមហ៊ុន​លក់​ផលិតផល​បច្ចេកវិទ្យា​ដាច់​បំផុត​ប្រចាំ​ឆ្នាំ​តាមរយៈ​ទូរស័ព្ទ iPhone ​ហើយ​នោះ ក្រុមហ៊ុន​អាមេរិក​នេះ ក៏​នៅ​មាន​នាឡិកា​ Apple Watch ​ផង​ដែរ ដែល​ជាប់​ក្នុង​បញ្ជី​ផលិតផល​​លក់​ដាច់​ប្រចាំ​ឆ្នាំ​២០១៧ ផង​ដែរ។ តាម​របាយការណ៍​ពី​គេហទំព័រ USAToday ឱ្យ​ដឹង​ថា ឆ្នាំ២០១៧ នេះ Apple លក់ Apple Watch ​ដាច់​ប្រមាណ ២០លាន​គ្រឿង គឺ​បាន​លេខ៤។ ចំណែក​ឧបករណ៍​ហ្គេម Nintendo Switch ​បាន​លេខ៥ លក់​ដាច់​ប្រមាណ ១៥លាន​គ្រឿង។

 

សូម​បញ្ជាក់​ថា មិន​មែន​តែ​ឆ្នាំ​នេះ​ដែល Apple iPhone ជាប់​ឈ្មោះ​ជា​ផលិតផល​លក់​ដាច់​ជាង​គេ​នៅ​លើ​ទីផ្សារ​ប្រចាំ​ឆ្នាំ​នោះ​ទេ ប៉ុន្តែ​កាលពី​ឆ្នាំ២០១៦ ក៏​ដូច​គ្នា​ដែរ ដោយ​លក់​ដាច់​ប្រមាណ ២១១លាន​គ្រឿង៕ ដោយ៖ រឹទ្ធិរាជ ប្រភព៖ USAToday