Apple ត្រូវ​គេ​រំពឹង​ថា នឹង​ផលិត​ទូរស័ព្ទ iPhone X ៣ម៉ូដែល​សម្រាប់​បញ្ចេញ​លើ​ទីផ្សារ​ឆ្នាំ២០១៨ នេះ ក្នុង​នោះ ២ម៉ូដែល​នឹង​បំពាក់​មក​ជាមួយ​អេក្រង់ OLED ​គឺ iPhone X និង iPhone X Plus ហើយ​មួយ​ម៉ូដែល​ផ្សេង​ទៀត​បំពាក់​អេក្រង់ LCD ​ដែល​នឹង​មាន​តម្លៃ​ធូរ​ថ្លៃ​ជាង​ម៉ូដែល OLED។

យោងតាម​របាយការណ៍​ថ្មីៗ​នេះ​ឱ្យ​ដឹង​ថា LG នឹង​ជា​ក្រុមហ៊ុន​ផ្គត់ផ្គង់​អេក្រង់ (Display) ទៅ​ឱ្យ​ក្រុមហ៊ុន Apple សម្រាប់​បំពាក់​លើ iPhone X Plus ឆ្នាំ​នេះ។ បច្ចុប្បន្ន​ក្រុមហ៊ុន Samsung ​ជា​ដៃគូ​ផ្គត់ផ្គង់​អេក្រង់​តែ​មួយ​គត់​សម្រាប់ iPhone X ដែល​កំពុង​ចរាចរ​លក់​លើ​ទីផ្សារ​សព្វថ្ងៃ។

គេ​រំពឹង​ថា នឹង​មាន iPhone X ទំហំ ៥,៨អ៊ីញ​ជំនាន់​ថ្មី ​និង iPhone X Plus ទំហំ ៦,៥អ៊ីញ​នឹង​បង្ហាញ​ខ្លួន​អម​ជាមួយ​អេក្រង់​ប្រភេទ OLED។ ចំណែក​ម៉ូដែល​ទី​បី នឹង​បំពាក់​អេក្រង់ LCD ​ប៉ុន្តែ​នឹង​មាន​ការ​រចនា​ស្រដៀង​ទៅ​នឹង iPhone X និង iPhone X Plus ដែរ។ ស្មាតហ្វូន​ទាំង​បី​នេះ នឹង​បំពាក់​ដោយ​មុខងារ​ស្កេន​ផ្ទៃ​មុខ Face ID របស់ Apple ដូច​គ្នា ហើយ​និង​មាន​ការ​ឌីហ្សាញ​ផ្នែក​កំពូល notch ដូច​គ្នា។ iPhone ថ្មី​ថែមទាំង​ត្រូវ​គេ​រំពឹង​ថា អាច​នឹង​ត្រូវ​បង្កើន​កម្លាំង​ថ្ម​ខ្ពស់​ជាង​មុន។ យើង​រំពឹង​ទៀត​ថា នឹង​បាន​ឃើញ iPhone SE ជំនាន់​ថ្មី​ផង​ដែរ​ក្នុង​ឆ្នាំ​នេះ ដែល​នឹង​មាន​រចនាបថ​ស្រដៀង​ទៅ​នឹង iPhone SE បច្ចុប្បន្ន។ យ៉ាងណា វា​អាច​ត្រូវ​ក្រុមហ៊ុន Apple សម្ពោធ​ចេញ​មុន iPhone X ទាំង​បី​ម៉ូដែល ដែល​ត្រូវ​រង់ចាំ​រហូត​ដល់​ចុង​ឆ្នាំ អំឡុង​ខែ​កញ្ញា ឬ​តុលា​ទើប​បង្ហាញ​ខ្លួន៕ ដោយ៖ រឹទ្ធិរាជ ប្រភព៖ MacRumors