ទម្លាប់ល្អៗដែលអ្នកគួរតែមានទាន់ខ្លួននៅក្មេង
ជាការពិតណាស់ សកម្មភាពដែលអ្នកធ្វើរាល់ថ្ងៃនឹងក្លាយជាទម្លាប់។ ហើយពេលដែលវាក្លាយជាទម្លាប់គឺអ្នកមិនងាយកែប្រែឡើយ បើទម្លាប់អាក្រក់ទៀត នោះកាន់តែលំបាក។ ដូច្នេះហើយ អ្នកគួរតែកសាងទម្លាប់ល្អៗឲ្យបានច្រើន នោះជីវិតរបស់អ្នកក៏មានន័យ រីករាយនិងជោគជ័យនាពេលក្រោយផងដែរ។ ខាងក្រោមនេះជាទម្លាប់ល្អៗដែលអ្នកគួរតែមាន៖
១) ដើរលេងឲ្យបានច្រើន៖ ពិតណាស់ថា ជីវិតមិនគួរធ្វើការ រៀនសូត្រនិងរស់នៅក្នុងមួយកន្លែងនោះទេ។ ដើរលេងខ្លះ រៀនសូត្រអ្វីថ្មី បង្កើនចំណេះដឹងទូទៅ ស្វែងយល់ពីវប្បធម៌និងមនុស្ស។ល។
២) រៀនធ្វើម្ហូប៖ ជាការពិតមិនអាចប្រកែកបាននោះទេ យើងរាល់គ្នាសុទ្ធតែត្រូវការទទួលទានអាហារជារៀងរាល់ថ្ងៃ។ ប្រសិនអ្នកចេះធ្វើម្ហូបដោយខ្លួនឯង អ្នកអាចនឹងសន្សំលុយបានច្រើនណាស់។ ហើយប្រសិនអ្នកមិនចេះ លុយដែលអ្នករកបានគឺមិនសល់នោះទេ។
៣) ស្គាល់មនុស្សឲ្យបានច្រើន៖ ទាន់ខ្លួននៅក្មេងអ៊ីចឹង អ្នកគួរតែស្គាល់មនុស្សឲ្យបានច្រើនព្រោះមនុស្សទាំងនេះអាចជាមនុស្សដែលអ្នកត្រូវពឹងពាក់ឬអាចជាគូអនាគតរបស់អ្នកក៏ថាបាន។
៤) អាន៖ អាន អានឲ្យបានច្រើន។ បុគ្គលជោគជ័យជាច្រើនលើពិភពលោកសុទ្ធតែចូលចិត្តអាន។ ឈប់រកលេសឲ្យខ្លួនឯងទៀតទៅ។ អានឲ្យច្រើន បង្កើនចំណេះដឹងនិងស្គាល់ពាក្យពេចន៍ល្អៗបានច្រើន។
៥) ចំណាយពេលវេលាសម្រាប់គ្រួសារ៖ ជាការពិត ពេលយើងនៅក្មេង យើងគួរតែខិតខំរៀនសូត្រ ធ្វើការ រកលុយ សម្រេចគោលដៅ។ ប៉ុន្តែ យើងរាល់គ្នាមិនចង់មានភាពស្ដាយក្រោយនាថ្ងៃអនាគត មែនទេ? ការងារពិតជាសំខាន់ ប៉ុន្តែយើងក៏មិនត្រូវភ្លេចមនុស្សសំខាន់ក្នុងគ្រួសារផងដែរ។
៦) ស្វែងរកចំណង់ចំណូលចិត្ត៖ សុភាសិតមួយពោលថា«ប្រសិនអ្នកពេញចិត្តនូវអ្វីដែលអ្នកធ្វើ អ្នកនឹងមិនធ្វើការសូម្បីតែមួយថ្ងៃ។» ដូច្នេះហើយ ទាន់ខ្លួននៅក្មេង សាកល្បងអ្វីថ្មីៗឲ្យបានច្រើននិងស្វែងរកនូវអ្វីដែលយើងស្រឡាញ់ឲ្យឃើញ៕
ប្រែសម្រួល៖អឹុង មុយយូ ប្រភព៖ developgoodhabits.com
