ក្រុមហ៊ុន Samsung ថ្មីៗនេះទើបសម្រេចបានសមិទ្ធផលថ្មីប្លែក ដែលជាក្ដារខៀនអេឡិចត្រូនិកដ៏ធំសម្រាប់ប្រើក្នុងអង្គប្រជុំតូចធំបានងាយស្រួលប្រកបដោយផលិតភាពខ្ពស់។ ក្ដារខៀនឆ្លាតវៃនេះនេះ មានឈ្មោះ Flip ទំហំ ៥៥អ៊ីញ ដែលទើបបានតាំងបង្ហាញក្នុងពិព័រណ៍ផលិតផលអេឡិចត្រូនិក CES 2018 នេះហើយ។
ក្ដារខៀនឌីជីថលថ្មីនេះ មានលក្ខណៈងាយស្រួលក្នុងការប្រើប្រាស់យ៉ាងសាមញ្ញអាចប្រើក្នុងទម្រង់បញ្ឈរក៏បាន ផ្ដេកក៏បាន។ យ៉ាងណា ក្រុមហ៊ុន Samsung មិនបានបង្ហាញនូវប្រព័ន្ធប្រតិបត្តិការ ឬសូហ្វ៊ែរដែលបំពាក់លើ Flip នោះឡើយ ប៉ុន្តែវាទំនងត្រូវបានក្រុមហ៊ុន Samsung ដាក់ឱ្យប្រើនូវមុខងារកត់ចំណាំ note, photos និងមុខងារមានប្រយោជន៍ផ្សេងៗទៀត ផ្ទុកនៅលើអេក្រង់ 4K របស់វា។
Flip របស់ Samsung ថែមទាំងមានបង្កប់មុខងារតំណភ្ជាប់ឥតខ្សែ wireless, USB, PC និង mobile port ដែលអ្នកអាចប្រើសម្រាប់តភ្ជាប់នឹងឧបករណ៍អេឡិចត្រូនិកសម្រាប់បង្ហាញអេក្រង់មកលើក្ដារខៀន។ អ្នកថែមទាំងអាចចែកចាយមាតិកាលើអេក្រង់របស់វា ទៅកាន់កុំព្យូទ័រដទៃ , ស្មាតហ្វូន និងថេប្លេតក៏បាន។ ក្ដារខៀននេះ អាចឱ្យគេប្រើក្នុងសម្រាប់គូរគំនូរបានដល់មនុស្ស ៤នាក់ ដំណាលគ្នា ជាមួយប៊ិច Stylus ឬម្រាមដៃបាន ហើយដូចជាមានកម្មវិធីសម្រាប់អង្គប្រជុំ meeting software ដើម្បីបង្កើត និងរក្សាទុកមាតិកាកិច្ចប្រជុំនៅក្នុងមូលដ្ឋានទិន្នន័យកណ្ដាល Central Database បាន៕
ដោយ៖ រឹទ្ធិរាជ
ប្រភព៖ theverge
