ផលិតផលចុងក្រោយស្ថិតក្នុងសែស្រឡាយស្មាតហ្វូន ZenFone របស់ Asus ត្រូវបានប្រកាសផ្លូវការ។ មិនយូរប៉ុន្មានបន្ទាប់ពីបានចេញលក់ ZenFone 3 Zoom រួច ក្រុមហ៊ុន Asus ឥឡូវនេះបានបញ្ចេញស្មាតហ្វូនថ្មីមួយម៉ូដែលទៀតហើយគឺ ZenFone Max Plus (M1) ដែលនឹងមានលក់លើទីផ្សារនៅខែកុម្ភៈខាងមុខ។
ZenFone Max Plus បំពាក់ដោយអេក្រង់ ៥,៧អ៊ីញអមដោយមុខងារពិសេស ស្កេនមុខដោះសោ (facial recognition) មានកម្លាំងថ្ម 4130mAh។ ទូរស័ព្ទនេះនឹងអាចបើកចោល (standby) រយៈពេល ២៦ម៉ោង ហើយអាចបើកវីដេអូរយៈពេល ១៣ម៉ោង។ វាថែមទាំងត្រូវបាន Asus បំពាក់បច្ចេកវិទ្យាគ្រប់គ្រងថាមពលថ្មឆ្លាតវៃដែលមានឈ្មោះ Asus PowerMaster។ បើតាមការបញ្ជាក់ពី Asus ឱ្យដឹងថា ដើម្បីសាកថ្ម ZenFone Max Plus ពេញ គឺ ប្រើរយៈពេល ៣ម៉ោង ឬអាចខលនិយាយទូរស័ព្ទបានរយៈពេល ៣ម៉ោងពេញ គ្រាន់តែសាកថ្មរយៈពេល ១៥នាទីប៉ុណ្ណោះ។
Max Plus ដំណើរការដោយប្រព័ន្ធប្រតិបត្តិការ Android 7.0 Nougat ហើយមានកម្រិត Full HD (2160x1080)px, RAM 3GB, អង្គចងចាំ 32GB បំពាក់ឈីប Octa-core និងក្រាហ្វិក ARM Mali-T860 និងមានសេវាកម្មផ្ទុកទិន្នន័យអនឡាញ Google Drive ទំហំដល់ 100GB សុពលភាពពេញ១ឆ្នាំ។
Max Plus ក៏បានបំពាក់មុខងារស្កេនក្រយៅដៃមកជាមួយនៅលើប៊ូតុង Home ផងដែរ ហើយមានកាមេរ៉ាក្រោយភ្លោះថែមទៀត។ កាមេរ៉ាមួយមានទំហំ 16MP ជាមួយកម្រិត f/2.0 aperture lens និងមុខងារសមត្ថភាពខ្ពស់ PixelMaster មួយចំនួន ដែលបង្កើនសមត្ថភាពឱ្យវាមាន resolution ធំស្មើនឹងកាមេរ៉ា 64MP ឯណោះ។ ចំណែកកាមេរ៉ាក្រោយមួយគ្រាប់ទៀត គឺផ្ដល់កម្រិត resolution ត្រឹមពាក់កណ្ដាលនៃកាមេរ៉ាទី១ ប៉ុន្តែវាលើសនៅត្រង់មានសមត្ថភាពចាប់មុំដល់ ១២០ដឺក្រេ ជាប្រភេទ wide-angle recording។
ប្រសិនបើអ្នកចាប់អារម្មណ៍ចង់ទិញ Max Plus សម្រាប់ខ្លួនអ្នកនោះ ស្មាតហ្វូនថ្មីនេះនឹងមានលក់លើទីផ្សារនៅខែកុម្ភៈខាងមុខ ជាមួយតម្លៃ ២២៩ដុល្លារ អមដោយជម្រើសពណ៌ ២ផ្សេងគ្នាគឺពណ៌ប្រាក់ Azure Silver និងពណ៌ខៀវ Deepsea Black៕
ដោយ៖ រឹទ្ធិរាជ
ប្រភព៖ techspot
