ប្រសិន​បើ​អ្នក​កំពុង​ស្វែងរក​កុំព្យូទ័រ​យួរដៃ​ Windows 10 ​អម​ជាមួយ​កម្រាស់​ស្ដើងៗ​នោះ អ្នក​អាច​នឹង​ពេញ​ចេញ​នូវ​ម៉ូដែល​ថ្មី​របស់ Asus Zenbook Flip 14 នេះ​មិន​ខាន។ ZenBook Flip 14 ​បំពាក់​ដោយ​អេក្រង់​ទំហំ ១៤អ៊ីញ​ប្រភេទ NanoEdge ​display ដែល​មាន​គែម​អេក្រង់​ស្ដើង​ស្លីម​ទាន់សម័យ ដែល​សាច់​អេក្រង់​លាត​សន្ធឹង​ស្មើ​នឹង ៨០% នៃ​ផ្ទៃ​មុខ​របស់​វា ដែល​អាច​បង្ហាញ​រូបភាព​បាន​ធំ តែ​ទំហំ​ខ្លួន​តូច។

លក្ខណៈ​ពិសេស​ផ្សេង​ទៀត​នៃ​អេក្រង់ NanoEdge ​នៅ​លើ ZenBook Flip 14 Hybrid ​មាន​នូវ​បច្ចេកវិទ្យា 178 degree wide-view ហើយ​មាន​កូល័រ​ដិត​ច្បាស់​ល្អ​ប្រភេទ​ជា sRGB Colour ១០០% ​ដែល​ច្របាច់​បញ្ចូល​ជាមួយ​បច្ចេកវិទ្យា Asus Eye Care និង​បច្ចេកវិទ្យា Asus Tru2Life Video។ ចំណែក​ផ្នែក​ខាង​ក្នុង Asus ZenBook Flip 14 ​បាន​បំពាក់​ដោយ​អង្គ​ប្រតិបត្តិ Intel Core i7 ​quad-core ​ជំនាន់​ទី៨ ​ហើយ​ប្រើ​ក្រាហ្វិក NVIDIA GeForce MX150 ​និង​មាន​ប៊ិច Asus Pen ​មក​ជាមួយ​ផង​ដែរ សម្រាប់​ជំនួយ​ដល់​កិច្ចការ​គំនូរ ការ​កត់​ចំណាំ​ផ្សេងៗ​នៅ​លើ​អេក្រង់ touchscreen របស់​វា ហើយ​ក៏​មាន​ក្ដារ​ចុច keyboard អាច​ដក​ដាច់​ពី​អេក្រង់​បាន​ផង​ដែរ។ https://youtu.be/lcFsISgvfpg កុំព្យូទ័រ​យួរដៃ​កូន​កាត់​ថេប្លេត​ថ្មី​របស់​ក្រុមហ៊ុន​តៃវ៉ាន់​នេះ មាន​កម្រាស់ ១៣,៩មិល្លីម៉ែត្រ ហើយ​មាន​ទម្ងន់​ត្រឹម ១,៤គីឡូក្រាម។ Asus បាន​ដំឡើង RAM ដល់ 16GB ​ហើយ​អង្គ​ចងចាំ​ប្រភេទ PCIe 3.0 x 4 ​ទំហំ​ដល់ 512GB (SSD)។ ក្រុមហ៊ុន Asus ​បាន​លើកឡើង​ថា៖ “ZenBook Flip 14 គឺ​ជា​កុំព្យូទ័រ​កូន​កាត់​ប្រភេទ 2-in-1 ​ដែល​ស្ដើង​ជាង​គេ​លើ​លោក និង​ដែល​មាន​ក្រាហ្វិក​ដាច់ ផ្ដល់​នូវ​សមត្ថភាព​ផ្នែក​ក្រាហ្វិក​មិន​ធ្លាប់​មាន​ពី​មុន នៅ​ក្នុង​ឧបករណ៍​ចល័ត​ដ៏​ស្ដើង ultra-compact នេះ។ ជាមួយ​ក្រាហ្វិក​ដាច់ (discrete graphics) ​អ្នក​អាច​រីករាយ​ក្នុង​ការ​ទស្សនា​វីដេអូ​មាន​ភាព​រលូន​ល្អ ហើយ​ផ្ដល់​សមត្ថភាព​សម្រាប់​ការ​កម្សាន្ត​ហ្គេម​លើ​កុំព្យូទ័រ​ផង​ដែរ” ។ កុំព្យូទ័រ​យួរដៃ Asus ZenBook Flip 14 ​ប្រភេទ 2-in-1 ​ត្រូវ​បាន​គេ​រំពឹង​ថា នឹង​បង្ហាញ​ខ្លួន​លើ​ទីផ្សារ​អំឡុង​ខែ​មីនា ឆ្នាំ២០១៨ ​ជាមួយ​តម្លៃ​ចាប់ពី ៨៩៩ដុល្លារ៕ ដោយ៖ រឹទ្ធិរាជ ប្រភព៖ Asus