តិចនិកដ៏មានប្រសិទ្ធភាពទាំង៥យ៉ាងដែលអ្នកគួរប្រើប្រាស់ជាមួយមនុស្សពិបាកៗ
ក្នុងជីវិត វាជារឿងដែលជៀសមិនផុតនោះទេដែលអ្នកត្រូវដោះស្រាយជាមួយមនុស្សពិបាកៗ។ មិនថាក្នុងសាលា ការងារ គ្រួសារឬសង្គមនោះទេ មនុស្សដែលពិបាកនិយាយគ្នាឬមិននិយាយហេតុផលមានគ្រប់ទីកន្លែងហ្នឹង។ ហើយមនុស្សប្រភេទនេះធ្វើឲ្យអ្នកតឹងចិត្ត មួម៉ៅ ក្ដៅក្រហាយ។ យ៉ាងណាមិញ Bizkhmer សូមណែនាំតិចនិកដ៏មានប្រសិទ្ធភាពទាំង៥យ៉ាងដែលអ្នកអាចប្រើប្រាស់ជាមួយមនុស្សពិបាកៗបាន៖
១) ស្ដាប់៖ ការស្ដាប់គឺជាជំហានទីមួយដែលអ្នកអាចដោះស្រាយជាមួយមនុស្សដែលមិននិយាយហេតុផលបានព្រោះមនុស្សគ្រប់រូបសុទ្ធតែចង់ឲ្យអ្នកដទៃស្ដាប់នូវសម្ដីរបស់ខ្លួន។ អ៊ីចឹងហើយ ប្រសិនជាអ្នកមិនបានស្តាប់ទៀត ស្ថានភាពនឹងកាន់តែអាក្រក់ កាន់តែមានភាពតានតឹងជាដើម។ ដូច្នេះហើយប្រសិនចង់ដោះស្រាយដោយសន្តិវិធី ចូរអ្នកស្ដាប់ជាមុនសិន។
២) គ្រប់គ្រងអារម្មណ៍របស់អ្នក៖ នៅពេលដែលអ្នកជួបជាមួយមនុស្សមិននិយាយហេតុផល អ្នកទាំងពីរពិបាកយល់គ្នាណាស់ហើយងាយស្រួលឈ្លោះប្រកែកគ្នាទៀតផង។ នៅពេលដែលស្ថានភាពអាក្រក់ចង់កើតឡើង អ្នកត្រូវចេះទប់កំហឹងរបស់អ្នកឲ្យជាប់ហើយដើរចេញសិន ចាំស្ថានភាពធូរស្រាលបន្តិច ចាំនិយាយគ្នាបន្តទៀត។
៣) កុំវាយតម្លៃ៖ ជាការពិតណាស់ មនុស្សគ្រប់រូបសុទ្ធតែមានពេលវេលាមួយដែលពិបាកចិត្ត ស្ត្រេសឬកើតទុក្ខជាដើម។ ហើយអារម្មណ៍ទាំងនេះធ្វើឲ្យពួកគេមានអារម្មណ៍អាក្រក់ហើយអាចនិយាយស្តីដោយគ្មានហេតុផលជាដើម។ ដូច្នេះហើយ ប្រសិនអ្នកជួបមនុស្សបែបនេះ ពេលខ្លះវាអាចជាការល្អប្រសិនអ្នកអាចថយមួយជំហានសិនហើយចាំនិយាយគ្នាពេលក្រោយ។ យើងទាំងគ្នាសុទ្ធតែមានថ្ងៃអាក្រក់។
៤) រក្សាកិត្តិយសរបស់អ្នក៖ មិនថាអ្នកដទៃមិននិយាយហេតុផល ជះកំហឹងមកលើអ្នកយ៉ាងណានោះទេ ប្រសិនអ្នកធ្វើដូចគ្នាទៅវិញ នោះអ្នកក៏មិនខុសពីមនុស្សពិបាកដែរ។ កុំបណ្ដាលឲ្យអត្តចរិតអាក្រក់របស់អ្នកដទៃមកកែប្រែអត្តចរិតល្អរបស់អ្នកឲ្យសោះ។
៥) ការចុះចាញ់គឺជាការឈ្នះ៖ អ្នកពុំចាំបាច់ប្រកែកគ្នាដើម្បីយកឈ្នះនោះទេប្រសិនវាធ្វើឲ្យអ្នកទាំងពីរកាន់តែមើលមុខគ្នាមិនចំ។ វាពិតជាលំបាកដែលអ្នកមិនតបតហើយឲ្យអ្នកដទៃឈ្នះ ប៉ុន្តែវាជួយឲ្យអារម្មណ៍ផ្លូវចិត្តអ្នកមិនក្ដៅក្រហាយហើយអ្នកក៏មិនខាតបង់អ្វីដែរប្រសិនអ្នកឲ្យអ្នកដទៃឈ្នះនោះ៕
ប្រែសម្រួល៖ អឺុង មុយយូ ប្រភព៖ Psychology Today
