ស្រប​ពេល​បណ្ដា​ក្រុមហ៊ុន​បច្ចេកវិទ្យា​ល្បីៗ​មួយ​ចំនួន កំពុង​បន្ថែម​ក្រុម​ផលិតផល​ថ្មី​ដែល​ជា​ស៊េរី​នាឡិកា​ដៃ​ឆ្លាតវៃ​រីឯ Microsoft ពេល​នេះ​ហាក់​សម្លឹង​ឃើញ​រូប​មន្ត​ថ្មី​ប្រឡូក​ចូល​ទីផ្សារ​ Smartwatch នឹង​គេ​ដែរ​ហើយ។ តាម​សេចក្ដី​រាយការណ៍​ថ្មី​មួយ​ពី​គេហទំព័រ techspot ឱ្យ​ដឹង​ថា Microsoft ​ទំនង​ផលិត​លក់ Xbox Watch ដែល​ជា​ smartwatch ​តម្លៃ​ធូរ​ថ្លៃ សម្រាប់​ប្រកួតប្រជែង​ទីផ្សារ​នាឡិកា​បច្ចុប្បន្ន​ដែល​មាន​តម្លៃ​ខ្ពស់ៗ។ https://twitter.com/Hikari_Calyx/status/955445148271308800   តាមពិត ​Microsoft ធ្លាប់​បាន​បង្ហាញ​គំរូ prototype ​នូវ​ផលិតផល​ពាក់​នឹង​ដៃ​របស់​ខ្លួន​រួច​មក​ហើយ​កាលពី​ឆ្នាំ២០១៣ ​ប៉ុន្តែ​មិន​បាន​បញ្ជាក់​លក្ខណៈ​សម្បត្តិ​លំអិត ហើយ​ក៏​មិន​ទាន់​បាន​ផលិត​លក់​លើ​ទីផ្សារ​នោះ​ឡើយ រហូត​មក​ដល់​បច្ចុប្បន្ន។ រូបថត​ប៉ុន្មាន​សន្លឹក​នេះ ត្រូវ​បាន​បង្ហោះ​ដោយ​គណនី Twitter ​មួយ​ឈ្មោះ Hikari Calyx ​ដែល​អះអាង​ថា វា​ជា​នាឡិកា Xbox Watch។ ក្រុមហ៊ុន Microsoft ​ទំនង​នឹង​បំពាក់​មុខងារ​សុខភាព​មួយ​ចំនួន ក៏​ដូច​ជា​មុខងារ​ត្រួតពិនិត្យ​សម្បទា​ផង​ដែរ ទៅ​ក្នុង Xbox Watch រួម​មាន៖ heart rate sensor, workout tracker និង​មុខងារ GPS ជាដើម។ យ៉ាងណា ប្រភព​ដដែល​នេះ មិន​បាន​អះអាង​ថា តើ​នៅ​ពេល​ណា​ទើប Microsoft ព្រម​បង្ហាញ Smartwatch របស់​ខ្លួន​ជា​ផ្លូវការ​នៅ​ឡើយ៕ ដោយ៖ រឹទ្ធិរាជ ប្រភព៖ techspot