ក្រុមហ៊ុន Japanese PC របស់​ជប៉ុន​នៅ​ដើម​ឆ្នាំ២០១៨ នេះ​ហាក់​មាន​ការ​ផ្ដោត​លើ​ទីផ្សារ​កុំព្យូទ័រ​ជាង​មុន ដោយ​បាន​បញ្ចេញ​កុំព្យូទ័រ​ស៊េរី​ថ្មី VAIO ​ដែល​បាន​បំពាក់​នូវ​ឈីប Intel Core ​ជំនាន់​ចុងក្រោយ​បង្អស់ 8th Gen Intel Core Processor។ Laptop ស៊េរី​ថ្មី​បែងចែក​ជា​ពីរ​ម៉ូដែល​គឺ VAIO S11 និង S13 ​ដែល​តម្លៃ​របស់​វា​ប្រហែល $1365 ​នៅ​ពេល​មាន​លក់។

កុំព្យូទ័រ​យួរដៃ VAIO S11 ​នេះ មាន​ទម្ងន់ ១,៩ផោន និង​មាន​អេក្រង់​ទំហំ ១១,៦អ៊ីញ​កម្រិត 1920x1080px ​ហើយ​មាន​កម្លាំង​ថ្ម​អាច​ប្រើ​បាន​រយៈពេល ១៥ម៉ោង​ក្រោយ​សាក​មួយ​ពេញ។ រីឯ​ម៉ូដែល​ធំ​ជាង​នេះ គឺ VAIO 13 ​វិញ​មាន​ទម្ងន់ ២,៤ផោន ​និង​មាន​អេក្រង់​ទំហំ ១៣,៣អ៊ីញ​កម្រិត 1920x1080px ។ ជម្រើស​អង្គ​ប្រតិបត្តិ​មាន​ចាប់ពី Intel Core i5-825s0U ឬ core i7-8550U ​quad-core CPUs ​ដែល​គាំទ្រ RAM ​ទំហំ​ដល់ 16GB ​និង​អង្គ​ផ្ទុក​ទិន្នន័យ​ប្រភេទ SSD ​ទំហំ 1TB។

ឡេបថប VAIO ថ្មី​ទាំង​ពីរ​នេះ បាន​បំពាក់​មក​ជាមួយ​រន្ធ USB 3.0 ​ចំនួន៣, រន្ធ HDMI ចំនួន១, រន្ធ SD Card, VGA, LAN ​និង​តំណភ្ជាប់​សម្រាប់​ស្តង់ដារ 802.11ac Wi-Fi, Bluetooth 4.1។ ក៏​មាន​តំណភ្ជាប់ 4G LTE ​ផង​ដែរ៕ ដោយ៖ រឹទ្ធិរាជ ប្រភព៖ PC Watch : Liliputing