iPhone ថ្មី ៣ម៉ូដែលរបស់ Apple ដែលនឹងបង្ហាញខ្លួនផ្លូវការចុងឆ្នាំ២០១៨ នេះ នឹងបានបំពាក់បច្ចេកវិទ្យា Face ID ដូចៗគ្នា បើដូច្នេះ វាក៏មិនមានអ្វីគួរភ្ញាក់ផ្អើលដែរ ប្រសិនក្រុមហ៊ុនអាមេរិកនេះ ថែម Face ID នៅលើ iPad ថ្មីទៀតនោះ។ ក្រុមហ៊ុនទើបបានបញ្ចេញជំនាន់ beta ដំបូងនៃសូហ្វ៊ែរ iOS 11.3 របស់ខ្លួន ហើយគេរំពឹងថា ប្រព័ន្ធប្រតិបត្តិការនេះនឹងត្រូវបំពាក់នៅលើ iPad ថ្មីផងដែរ។
ថេប្លេតថ្មីនេះ នឹងជា iPad ទំនើបជាងម៉ូដែលមុនៗ 'modern iPad' ហើយប្រើប្រាស់ iOS 11.3 ព្រោះនៅពេល iPhone X បានរកឃើញដំបូងក្នុងសូហ្វ៊ែរ iOS ក៏ត្រូវបានតាងជា 'modern iPhone' ដែរ។ ការណែនាំនេះថា Apple នឹងបញ្ចេញ iPad ស៊េរីថ្មីទំនើបជាងមុន ហើយប្រហែលជាគ្មានប៊ូតុង Home ទៀតទេ និងមានការឌីហ្សាញគែមអេក្រង់ស្ដើង រចនាបថយកតាម iPhone ដោយមានផ្នែកកំពូលខាងលើបែបឆកដែរ។
iPad ថ្មីថែមទាំងត្រូវគេរាយការណ៍ថា អាចនឹងបំពាក់មុខងារទំនើប ស្កេនផ្ទៃមុខសម្រាប់ដោះសោទូរស័ព្ទ Face ID ដូចមាននៅលើ iPhone X បច្ចុប្បន្នអីចឹងដែរ។ វានឹងជា iPad ស៊េរីខ្ពស់មួយ ដែលបំពាក់បច្ចេកវិទ្យាចុងក្រោយសព្វគ្រប់តែម្ដង។ ឆាប់ៗខាងមុខយើងនឹងបានដឹងកាន់តែច្បាស់អំពី iPad ជំនាន់ថ្មីនេះ រួមនឹងរូបភាពពិតប្រាកដរបស់វាមួយចំនួន ក៏ដូចជាលក្ខណៈសម្បត្តិផងដែរ៕
ដោយ៖ រឹទ្ធិរាជ
ប្រភព៖ iHelpBR, MacRumors
